Pynjari section 144 CrPC u District Magistrate ha Ri Bhoi hadien ba la pyntreikam ïa ka Model Code of Conduct

By Mawphor News Desk On Jan 20, 2023

Electronic Voting Machine, EVM with male hand voting sign pressing button casting vote Indian election 3D illustration

Nongpoh, Kyllalyngkot 19: U District Magistrate ka Ri Bhoi District u la pyntip paidbah sha baroh ki paidbah ka Ri Bhoi District ba ka Election Commission ka Ri India ka la dep ban pynbna ïaka tarik jong ka election ban jied thymmai ïa ki nongmihkhmat sha ka ïing Dorbar thaw aiñ ka jylla na ka bynta u snem 2023 ka ban long ha ka 27 tarik Rymphang 2023 bad ruh u la pyntip paidbah ba ki kyndon aiñ jong ka Model Code of Conduct ka la treikam naduh katei ka sngi ba la pynbna ïa ka tarik jong ka electon.
Khnang ban ïaid beit ïaid ryntih ka jingjied ïa ki nongmihkhmat ha kane ka election kumba la pynkup bor ha ka kyndon 144 CrPC , u Disstrict magistrate ka Ri Bhoi u la pynjari ruh ïa kane ka kyndon na ka bynta ban tehlakam bad ruh ban nym pynkheiñ ïa ki kyndon jong ka Model Code of Conduct ban ïaid beit ïaid ryntih ka jingjied ïa ki Nongmihkhmat na kane ka District.
Ka kyrwoh ba la phah sha ki lad pathai khubor lyngba katei ka kyndon 144 CrPC ka la khang pyrshah ban thoh jingthoh ha ki kynroh, ban tah ïa ki poster lane kino kino jingthoh kiba ïa dei ba ka bynta ban pynkhlaiñ ïa u kyrtong tang na ka bynta ban ioh jingkyrshan na ki paidbah bad ruh la khang pyrshah ban wah lama ha kino kino ki ophis treikam sorkar ne ki jaka ba hap ha ka sorkar.
Kane ka kyndon aiñ ka la khang pyrshah ruh ban wah ïa ki lama ne ki banner ha ki jaka ki riew shimet khlem pat da ioh bor na ki trai jaka bad la pyntip ruh ba ka jingwah ïa ki Lama ne ki sticker ha ki Kali kamai paidbah na ka bynta ka jingïalap election dei ban ioh bor shuwa na ka ophis u District Election Officer Lane ki Returning Officer.
Kaba kham teh kyndon shuh shuh ka long ba lyngba katei ka kyndon aiñ la khang pyrshah ruh ban rah ïa ki tiar pynmynsaw kum ki suloi, ki pistol bad kiwei kiwei ki tiar pynmynsaw tad haduh ba la kut ka election bad ha kajuh ka por ruh la btah ïa baroh kito kiba don license kum ki suloi ne ki pistol bad kiwei kiwei ki tiar ba pynmynaw ki dei ban leit buh ïa ki tiar ha ki Police station hapoh ka 14 sngi naduh ba la pyntreikam ïa kane ka kyndon aiñ.
La pyntip ruh la khang pyrshah ban pynlong ïa ki jingïalang election khlem pat da ioh bor na ka ophis u District Eelection Officer bad ruh na ka bynta ka jingpyndonkam ïa ki tiar pynsawa (P.A System) ki dei ban pan bor shuwa na ka ophis u District Election Officer bad ruh na ki Rangbah Shnong bad la shah ruh ban pyndonkam ïa ki tiar jingpynsawa na ka bynta ka election tang hapoh ka por 10 baje mynmiet.
Kino kino kiba ïa leh pyrshah kin ngan ha ka jingpynshitom katkum katei ka kyndon aiñ bad ruh na ka bynta ka rally ne ka jingïaid paidbah ruh dei ban ioh bor nan ka ophis u District Election Officer. Kino kino kiba ïaleh pyrshah kin shah pynshitom lyngba katei ka kyndon aiñ ha kaba kane ka kyndon aiñ ka la treikam mardor bad kan dang treikam ruh katba ym pat pynbna da kuwei pat, ong kyrwoh ba la phah da u District Magistrate ka Ri Bhoi.