Shillong, Risaw 22: Ka iingbishar High Court ka la pdiang ban pynim biang ïa ka mukotduma jong u (L) Kynjaimon Amse halor ka jingmudui jong ka sniew ka surok NH-6 ha East Jaiñtia Hills District.
Ha kaba ïadei bad kane ka jingpynim biang jong ka ïingbishar na ka liang jong ka Dorbar Shnong Umkiang lyngba kane ka khubor ka ai khublei shikatdei eh ïa ka High Court badonburom jong ka Meghalaya ban shimti da ka Suo Moto PIL na bynta ban pynim ïa ka mukotduma ba la ai da u samla (L) Kynjaimon Amse uba dei ruh u Assistant Waheh Shnong jong ka Shnong Umkiang pyrshah ïa ka NHAI na bynta ka jingjot rathai jong ka surok shilynter ka surok bah NH 6 khamtam naduh Lumshnong haduh Malidor.
Ha ka kyrwoh khubor na ka liang ka Dorbar Shnong Umkiang ka ai khublei khamtam eh ïa u Muktiar jong u Kynjaimon Amse u S. Panthi uba lah pyntip sha ka Court ba u nongmudui u lah khlad bad uba kyrpad ïa ka High Court ba donburom ban pynim ïa kane ka PIL u samla Kynjaimon namar kadei na bynta ka bha ka miat u paidbah.
Kumta ka Dorbar Shnong Umkiang ka ai khublei shikatdei eh ïa kine baroh ar ba ki lah shimkhia ïa ka bit ka biang uba bun balang.
Ha kaba ïadei bad kane na ka liang ka Dorbar Shnong Umkiang, ka kyrmen ba lyngba kane ka PIL ba la kyrpad da u Muktiar S. Panthi ha ïingkashari High Court ka NHAI kan shna bha ïa kane ka surok NH-6 kumba dei rukom katkum ka juk stad ba mynta.
