Nongstoiñ, Naiwieng, 11: Ka jingdon jong ki ar tylli ki post elektrik ha syndah jong ka Mount Hermon English School kaba don ha ka kyntoit Mawbyrshem bad uwei pat ha syndah jong kawei ka ïing briew kaba ar mala ha ka kyntoit them ïew, ka la pynlong ïa ki dkhot ka Hynñiewtrep Youth Council New Nongstoiñ Unit ba la ialam da u samla Wilson Myrthong President ka unit ba kin leit ban ïakynduh ïa u Executive Engineer bad u Sub Divisional Officer ka MeECL Nongstoiñ Division, ban kyrpad ïa ki ba kin thaw lad ban pynkynriah noh bad ban pynïeng noh kham pajih.
U Samla Willson Myrthong haba ïakren bad u nongthoh khubor u la ong ba hadien ba ki nongpynïaid jong ka skul Mount Hermon, lem bad ki nongshong shnong ha ka kyntoit Mawbyrshem lem bad ki trai jong kawei ka ïing ha ka kyntoit Them ïew, ki la pyntip bad kyrpad ïa ki dkhot ka seng ba kin ïa peit lem. Na ka liang jong ki, ki la shimkhia bad mynta ka sngi ki la leit ban ïakynduh ïa kitei ki ophisar bad ki la aiti ruh da ka jingthoh ban kyrpad ïa ki ba kin leh ei ei halor kane.
Utei u nongïalam ka seng u la ong ruh ba ka jingleit ïakynduh jong ki ka la long kaba sei soh, namar ba kitei ki ophisar baroh ar ngut ki la sngap bad shimkhia ïa katei ka kam ha kaba ki la pah wut wut ïa uwei u nongtrei ban leit jurip ïa kitei ki post ryngkat bad ki nongïalam ka seng.
Kitei ki ophisar ki la kular ruh ba ynda utei u nongtrei jong ka ophis u la wan pyntip ha ki, kin sa phah ïa ki nongtrei ba kin pynkynriah noh kloi katba lah ïa kitei ki post eletrik, khnang ba ki khynnah skul bad ki nongshong shnong kin lait na kano kano ka jingshah ktah ha ka bording.
