Pynïar shuh shuh ka Viksit Bharat Sankalp Yatra ban poi sha ki jaka ba eh ban poi
![](https://mawphor.com/wp-content/uploads/2023/11/Untitled-1-copy-Copy.jpg)
Delhi, Naiwieng, 19: Ha ka jingai jingtip bad ka jingpynpoi kam ka bym pat ju ïohi, ka Vikasit Bharat Sankalp Yatra, ka sienjam kaba heh tam jong ka Sorkar India, ka la jam shakhmat ha ka jingpoi sha ki jaka ba jynjar tam ban poi ha ka ri ban ai jingtip shaphang ki skhim ka bha ka miat jong ka Sorkar India bad ka jingpynurlong ïa 100% ki prokram ba kongsan jong ka Sorkar.
Kane ka campaign, ba la plié paidbah da u Myntri Rangbah Duh, u Narendra Modi ha ka 15 tarik u Naiwieng, 2023 ha Khunti, Jharkhand ka la sdang lyngba ka jingpyllait paidbah ïa ki kali Information Education Communication (IEC) van ba la pyllait paidbah ha kajuh ka por na ki jaka bapher bapher. Kine ki kali IEC ki la thmu ban ai jingtip ïa ki briew shaphang ki skhim bapher bapher kiba ai jingmyntoi ïa ki briew bad ruh ban khring ïa ka jingïashim bynta jong ki briew ha ka jingngeit ha ka “Jan Bhagidari” ban pynthikna ïa ka jingpyntreikam pura jong ki skhim. Ka Yatra ka don nongrim ha ka jingthmu ban don ka roi ka par ïa baroh, ha ka jingpyrshang ban pynthikna ba ki jingmyntoi na ki skhim Sorkar ki poi sha baroh ki briew jong ka ri.
Ka jingpoi ka kali IEC Van sha ka them Zanaskar bad Kargil ha Ladakh
Ka Vikasit Bharat Sankalp Yatra ka la poi sha ka them Zanaskar bad Kargil ha Ladakh, bad ka la rah ïa ka khubor jong kane ka campaign sha ki jaka jong ka ri ba jynjar tam ban poi.
Poi ka Vikas Bharat Sankalp Yatra sha Distrik rilum jong ka Kinnaur, Himachal Pradesh
Ka Yatra ka la poi sha ka distrik rilum jong ka Kinnaur ha Himachal Pradesh, ha kaba ka la ai jingtip shaphang ki skhim bapher bapher jong ka Sorkar Pdeng sha ki briew kiba sah ha kane ka distrik.
Poi ka kali IEC sha West Jaiñtia Hills bad East Khasi Hills
Ka kali IEC jong kane ka campaign ka la poi sha West Jaiñtia Hills bad East Khasi Hills, kaba la rah ïa ka thong jong kane ka Yatra ban ai jingtip shaphang ki skhim jong ka Sorkar.
Ïashim bynta ki nongshong shnong ka Tawang, Arunachal Pradesh ha ka Yatra
Ka Viksit Bharat Sankalp Yatra ka la ïoh jingkyrshan na ki briew jong ka Tawang, Arunachal Pradesh, kiba la ai jingkyrshan na ka bynta ka India kaba la kiew shaphrang.
Ka jingpynlong ïa ki Health Camp ha Uttarakhand
La pynlong ïa ki health camp ha ka Vikasit Bharat Sankalp Yatra program ha ki shnong Utpalta bad Gangrau jong ka Kalsi, ha kaba 109 ngut ki nongshong shnong ki dei kiba la pyndep ïa ka screening na ka bynta ka jngpang TB bad 89 ngut ki nongshong shnong ki dei kiba la pyndep ïa ka screening na ka bynta ka jingpang sickle cell anemia.
Ka jingai jingtip shaphang ki skhim ha Bihar
Ha ka por ba dang sdang, ka Yatra ka la poi sha ki briew jong ka shnong Lohra kaba hap hapoh ka Aghaura block jong ka Kaimur district ha Bihar. La ai jingtip ïa ki nongshong shnong shaphang ka Ujjwala Yojana, PM-Kisan, ki Krai bad kiwei kiwei ki skhim.
Ka jingpynkupbor ïa ki briew jong ka Odisha
Ka Viksit Bharat Sankalp Yatra kaba dang ïaid shakhmat mynta ka la ai jingtip ïa ki briew bad ka la wanrah ruh ïa ki jingmyntoi na ki skhim sha ka Chitrakonda block, Malkangiri district ha Odisha.
Haduh ka 17 tarik u Naiwieng, 2023, ka Yatra ka la mad ïa ka jingïashim bynta da palat 200,000 ngut ki briew kaba pyni ïa ka jingpdiang ki briew bad ka jingkhmih lynti jong ki ban ïashim bynta ha ka roi ka par jong ka ri.
Ka Viksit Bharat Sankalp Yatra kam dei tang ka prokram ai jingtip; ka dei ka sienjam kaba heh ban pynthikna ba ki jingmyntoi jong ki skhim Sorkar ki poi sha baroh ki briew bad kumta ka pynurlong ïa ka jingpynpoi pura ïa kine ki skhim bad ka jingïashim bynta jong ki briew ha ka roi ka par jong ka ri. Shuwa ka 25 tarik u Kyllalyngkot, ka yatra ka thmu ban poi sha palat 2.55 lak tylli ki Gram Panchayat bad palat 3600 tylli ki bor pynïaid jaka sor ha kylleng ka ri.