Ha shwa ban sdang ka Kopati Puja Raij Raliang baroh ki khun ka Raij u shnong u thaw ula lum lang ïa u kba u khaw na lyngkha risa da ka Nguh ka dem Blei ban poi suk poi saiñ u kba sha la ïing trep ban pyndep ïa ka dung khoowner da ka nguh ka dem da u ne ka ba pan chiar ryngkat bad ka Raij hangta keiñ la riew ka ksing ka dhah ha shnong ha thaw kum ka dak ba la poi ka Kopati Puja, baroh ki samla samhoi ki la ïa tem ka ksing ka bom man la ka janmiet ki pynsawa jam ïa ka, bad ki la ïa bun kam bha ha ka ban hikai Mastieh ha ïing u Lyngdoh (ïing Raij) bad u Wamon, khnang ba kin lah bha ban Mastieh ha kata ka sngi. Ha kane ka jingtem ksing bad Mastieh Niam dei tang ki shynrang, namar ki khynthei ki don la ka jong ka bynta.
Ka Kopati Puja Raij Raliang kaba ju long man la u snem, mynta u snem ruh kan pynlong ïa ka ha ka 28th-29-th-30th Nov, 2023 ha shnong Raliang, bad ha ka 29th kan long ka sngi kaba khraw, namar ha kane ka sngi kan don ka jinglehñiam naduh ka por mynstep, bad ha ka por mynsngi kan don ka jingshad Ñiam Tynrai.
Kane ka Kopati Puja ka long ka jinglehñiam bad ka jingai nguh ïa u Nongbuh Nongthaw uba la buh bad sam bynta ïa u khun bynriew ha jrong ka mei ramew.
Ïa kane ka jinglehñiam Kopati Puja la pyndep ïa ka jinglehñiam Pomblang hapoh ka K’law Blei (Khlow Blai) kaba don ka duwan kñia hapdeng shnong, bad hadien nangta pat la ïa shad Mastieh hangne hi naduh u Wamon, u Lyngdoh, u Dolloi, u Pator, ki 7 Rangbah Kur bad na ki Raij kiba ïa don bynta lang ha kane ka Kopati bad na ki samla bapher bapher, bad hadien nangta u Soh-Blei ula leit ban ai nguh ïa u syntiew Blei sha ka wah Um-ïurem ryngkat ki longkpa bad samla, bad hadien ba la wan phai nangta la ïoh pat ka shad Ñiam Tynrai na ki khun Ñiamtre ha madan Seiñ Raij Chrah Umphula ha manla ki dong bad kyntoit jong ka Shnong Raliang, bad na Laskeiñ, na Nongkynrih, na ki Raij bapher bapher ban pynphuh pynphieng shuh shuh ïa kane ka jinglehñiam. Hadien ba la kut ka shad Ñiam Tynrai na ki khun Ñiamtre la ïoh pat sa ka shad Niam Mastieh ha phyllaw ïing u Wamon ha ryngkat ka ksing ka dhah na u harmuid, ki dhulia bad ki samla kiba bat Ñiam.
Ïa ka Kopati Puja la juh pynlong ïa ka ha manla u bnai November man la u snem hadien ba la dep ot ïa u kba u khaw na lyngkha risa kaba la dep trei baroh shi samoi, kaba u Kynrad u la ai bad pyndap smam ïa u thiar jong ngi baroh saw aiom, bad u ba la ai ïa ngi hapdeng ka jingkoit jingkhiah krad haduh ba ngi la lah ban lum ban lang ïa u kba sha la ïing. Ha kane ka jinglehñiam la don kumba san tylli ki Raij kiba pyndep bad ban ai nguh ïa ka Kopati Puja jong ka Riaj Raliang, naduh ka Raij Raliang, ka Raij Khonshnong, ka Raij Ñiawkmai, ka Raij Ionglang, bad ka Raij Lapnei. Ka jinglehñiam ïa ka Kopati Puja ka long haduh lai sngi lynter naduh ka sngi Nartiang, Musiang, bad Mushai, ha kine ki ar sngi lynter baroh shi shimiet ïa shad ïa kmen ïa risa kynhoi ki samla shynrang bad Rangbah ha ryngkat ka ksing ka dhah bad kiba bat ñiam, la pyllong ïa kane ka Kopati Puja ka long ban duwai phirat ban dup ïoh ka shait ka khlaiñ, ka manbha ka man miat ka trei ka ktah, ka pule ka puthi ka spah ka phew, bad ha baroh ki liang ha ka long briew man briew.
Kopati Puja Wasuk ïa phi waroh.
