Chennai, Lber 14: Uwei u doktor uba na Chennai, uba la ïap bad ka kurim bad arngut ki khun shynrang ba dang samla ha ka sngi Palei u la duh nong ruh haduh T. 5 klur ka pisa.
Ïa une u lanot la tip kyrteng da u Dr Balamurugan, uba dei ruh uba la pyndep ïa ka jingpule sonologist, bad ka kurim jong u kaba kyrteng Sumathi, kaba dei ruh ka lawyer, bad ki khun ki kti, ha kaba uwei u dei uba la dap 17 snem ka rta uba kyrteng u Dasvanth bad uwei pat uba la 15 snem ka rta u ba kyrteng u Lingesh. Katkum ka jingïathuh ki pulit ïa ka met jong kine ki lanot la shem hapoh kawei ka kamra kaba ha Anna Nagar West, katba ïa ki khun ki kti pat la shem ha kawei pat ka kamra.
Ïa kine ki met ïap la shem da u nongniah kali kaba ha la ïing hi ha ka step jong ka sngi Palei. Hadien ba khlem da ïoh ka jubab na ka ïing, u la pyntip sha kiba sah marjan, ha kaba ki la rung na ki jingkhang ïit bad kiba la ïohi ïa ki met ïap jong ki. Na ka liang ki pulit ki la poi ha kane ka ïing bad ki la kit noh ïa ki metïap sha Kilpauk Medical College (KMC) Hospital na ka bynta ban pyndep ïa ka post-mortem.
U Dr Balamurugan u la dei ruh uba long trai ïa kiba bun ki ultrasound diagnostic centre ha Chennai. “Ngi la suba ba ki la pynïap hi ïalade na ka daw jong ka ram kaba ki la kit, hynrei ngi dang tohkit ïa kane ka jingjia bad kumba ka long haduh mynta kam shym la don kano kano ka jingujor,” ïathuh uwei u pulit ophisar.
Na ka liang ki pulit ki la pynlong ruh ka jingtohkit haba ïadei bad ka jingdon pisa bad ki kam ki jam jong u Dr Balamurugan ban sngewthuh ha kaba ïadei bad kane ka jingjia.
