Shillong, Lber 14: Ka khubor ba la ïoh na ki pulit la ïathuh ba kawei ka longkmie kaba sah ha nongbah Shillong ka la phah ka jingujor ba ha ka 3 tarik mynta u bnai ha ka por 2.30 nohphai sngi ka la ïohpdiang ïa kiba bun ki jingshah phone ha kaba uba phone u la kam ba u dei u Customer Executive jong ka ‘Renee Cosmetics’ ha kaba u la pyntip ïa ka ba ka la jop ïa ka khusnam kum shi bynta na ka promotional campaign jong ka company. Ïa kane ka la longkmie kaba la ujor la pynthikna ba kan ïoh ruh ïa ka iPhone 15 kum ka jingai sngewbha lada ka thied ïa ki tiar jong ka Amazon kaba long T. 5000/-, bad ka pisa ruh kaba T. 3,500/- kum ka pisa kaba kan ïoh ban shah pynphai, hynrei hadien kane ka longkmie ka la sngewthuh ba ka la shah thok.
Ha kawei pat ka jingjia ka Safina Begum ka la phah ka jingujor ba ha ka 9 mynta u bnai ha ka por 9.30 mynmied, ki runar bym lah ban ithuh ki la tuh ïa ka kali Hyundai jong ka, kaba don u nombar ML-05C-5539 na Lumshatsngi, Laban, Shillong. Kane ka kam mynta na ka liang ki pulit ki dang pynlong ïa ka jingtohkit.
Shuh shuh ki pulit ki la ïathuh ba u Bah William Lyngdoh Mawlong u la phah ka jingujor ba ki runar bym lah ban ithuh ki la prong hapoh ka ophis ka Delivery Ltd., kaba ha Umbang Sumer (RB) bad ki la tuh ka pisa T. 65,863/- hajar.
