Nongstoiñ, Naiwieng 26: Ka seng Hynñiewtrep Youth’s Council Nongtrai Circle ha ka sngi saitjaiñ, ka la ïoh ban khynra ïa ki bar jylla hapoh ka thaiñ kiba wan trei shna ïing khlem ki kot ki sla kiba biang. Ka seng hadien ba ka la ïoh bat, ka la beh bad ka la pynleit phai ïa ki sha Assam.
U bah Arquies Marbaniang Public Secretary HYC Nongtrai Circle, u la ong ba ka seng ka la lap ïa ki bar jylla kiba wan trei pipe um bad Tanky um hapoh ka shnong Mawkhumkha lyngba ka scheme JJM. Hynrei ynda la peit ïa ki kot ki sa ki khlem don, kumta ka seng ka la beh bad pynphai noh ïa ki.
Ka seng ka kyntu ïa ki para dong para thaiñ bad khamtam eh ïa ki khlieh nongsynshar shnong, ba kin sngewbha wat ailad ïa kiba na bar jylla ban wan trei ha ki thaiñ, khlem ki kot ki sla kiba biang.
Ka seng ka kyntu ruh sha baroh ban sngewbha ai lad ïa ki para doh para snam lajong ban ïa ïoh trei ïoh bylla, khamtam eh ha kine ki juk kyrduh kam mynta.
Kumjuh ruh ka dawa ïa ka Sorkar ban pyntreikam noh ïa ka ILP ka sorkar jylla, namar ka HYC kan nang pynjur shuh shuh ïa ka jingkhynra ha ka thaiñ.
