Mawkyrwat, ‘Naiwieng 26: Ka Mawten Sports Club ha ka sngi saitjaiñ jong ka taïew ka la ïoh ban plie pyrda ïa ka lympung ïalehkai kynjatbol kaba la tip kum ka 3rd Above 40 Football Tournament 2023 ha madan Mawpyllun, Mawten, South West Khasi Hills District ha kaba ki don baroh 14 tylli ki kynhun kiba la wan ban ïashimbynta.
Ha kane ka jingïalehkai, ka Evergreen Nongjri Sports Club ka la jop da 3 – 1 kol pyrshah ïa ka Upper Shillong Football Team ha kaba ïa ki kol la thep da u Manroylang Dkhar, u Nicos Laloo bad na u Ricky Nongtnger. Ïa ka shi kol jong ka Upper Shillong FT pat la thep da u Ïaiphira Lyngdoh.
Ha ka jingïalehkai kaba ar pat, ka Latylli Veteran Football Team ka la jop da 2 – 1 kol pyrshah ïa ka Ïawpaw Vateran Football Team ha kaba ïa ki kol jong ka Latylli Veteran FT la thep da u Georgeson Kurbah ha ka minit kaba 15 bad da u Teibor Shabong ha ka minit kaba 23 katba ka Ïawpaw Vateran Football Team ka la ïoh ïa ka 1 kol na u Mining Pariong ha ka minit kaba 8.
Ïa kane ka lympung ïalehkai la wan ban plie pyrda da u bah Elevenson Wanniang ha ryngkat ka jingïadonlang ki nongkitkam jong ka Mawten Sports Club, ki riew rangbah jong ka shnong Mawten bad ruh ki nongwan peit kai.
