Pynhap pyrda u MLA ka Nongpoh ïaka Inter House Athletic Meet ka skul St. Paul’s HSS ha Nongpoh

Nongpoh, Iaiong 01 : Hadien ka jingïaid shaphrang jong ka lympung ïalehkai sports ki khynnah skul, ka St. Paul’s Higher Secondary School, Nongpoh hynin ka sngi kala pynhap pyrda noh ïaka Inter House Athletic Meet ba 3 sngi bala sdang naduh ka 29 tarik mynta u bnai ha madan NSCA Pahamsyiem hadien ka jing ïaid beit ïaid ryntih jong ka lympung da ka jing ïa shim bynta shitrhem jong ki House bapher bapher bala phiah na katei ka skul.
Katei ka lympung da ka jingjop kala poi noh sha kaba kut mynta ka sngi hadien ba ki khynnah kynthei bad shynrang naki house bapher bapher kila ioh ban pyni bad sei madan ïala ki sap ki phong naduh ka sngi Balang bala plie pyrda ïaka da u Dr. C Lyngdoh MLA ka Umsning.
Ïa katei ka lympung ïalehkai sports ki khynnah skul la wan ban pynhap pyrda noh ïaka mynta ka sngi da u Bah Mayral Born Syiem MLA ka Nongpoh kum u kongsan haka jingdonlang ka Sr. Angelina Marak Headmistress, Bah Jedwin Lyngdoh Rangbah Shnong Pahamsyiem bad kiwei kiwei ki riew rangbah, lem bad ki nonghikai bad ki khynnah skul.
U Bah Mayral Born Syiem kum u kongsan haba kren ha kane ka sngi u la ai ka jingïaroh ïaki bor pynïaid skul jong ka St. Paul’s bala pynlong ïa katei ka lympung, bad pynpaw ruh ïaka jing sngewkmen kaba khraw ban iohi ba ki khynnah skul jong katei ka skul ki don shisha ïaka sap bad ka mynsiem ïalehkai bad thrang ban ioh khur ïaki khunsam na kane ka lympung, haka juh ka por u la pynpaw ruh ka jing sngewkmen ban ïa don bynta lang bad ki khynnah skul ha kane ka sngi kum ka jing ai mynsiem ba kin dang ïalehkai bha bad pyndonkam hok ïaka sap kaba ki don naka bynta ban kiew shaphrang haka kam ïalehkai sports kumba ka tei ka skul ka dei kawei naki skul ba paw haka kam ïalehkai sports nalor ka pule puthi.
“Ngi sngew sarong ïaka skul St. Pauls kaba la ju pynmih ïaki samla kiba pass bha haka SSLC bad HSSLC bad nalor ka pule puthi katei ka skul ka dei ruh kaba ju pynmih ïaki rang bad thei ïalehkai ba tbit kiba ju mih khmat ïaka district haka kam ïalehkai sports, da kaba kyntu ruh ïaki khynnah ha katei ka sngi ba kidei ban minot thop haka jingpule jong ki bad pyndonkam hok ruh ïaka sap kaba ki don, ban pyndon burom ïaki kmie ki kpa bad ki nonghikai” la ong u Bah Mayral da kaba bynrap ruh ba kum ki khynnah skul kim dei pat ban ngop haki jingdih ba sniew khamtam ka kyiad, u drok bad kiwei kiwei kiba ktah ïaka met bad ka longrynieng lada ki kwah ban poi shaka thong haka jingim jong ki.
La sam ruh ïaki khusnam ha katei ka sngi ha kaba ka Blue House kala rah ïaka nam lahduh, ka Red House kala rah ïaka kyrdan ba ar bad ka Yellow House haka kyrdan ba lai nalor ki khusnam shimet ban ai mynsiem ïaki khynnah skul.