Ka jingjop kum u nongmihkhmat ka wan ruh ka jingbah khlieh kaba khia: Mayralborn

Nongpoh, Ïaïong 01: Ki nongïalam ka United Democratic Party (UDP) Nongpoh Circle mynta ka sngi ka la pynkup burom ïa u Bah Mayralborn Syiem MLA ka Nongpoh Constituency, halor ka jingjop don burom jong u ban poi sha ka thong ban long kum u nongmihkhmat sha ka ïing Dorbar thawaiñ ka jylla hadien ba ki paidbah jong ka Nongpoh Constiteuncy kila pynjop donburom ïa u ha kane ka elekshon bala dep.
Ha kane ka sngi ka jingpynkup burom la wan ruh ban sakhi lang da ki nongkitkam kiba hakhmat jong ka Seng UDP kiba kynthup naduh u Bah Balajied Ranee, MDC ka Nongpoh Constituency, Bah Donbok Khymdeit President UDP Ri-Bhoi, Bah Micheal Kharhunai Secretary UDP Ri-Bhoi, u Bongthai ka Raid Umwang, ki dhot ka UDP Nongpoh Circle, Bah R.R Makdoh Nongïalam ba radbah jong ka UDP Ri-Bhoi, ki dkhot naka Women’s Wings, ki dkhot ka Youth Wing, ki dkhot jong ki Unit bapher bapher bad ki nongkyrshan ka Party UDP bad kiwei kiwei.
Ha kane ka sngi kum ka dak ka jingsngewnguh ïaka jingnoh synñiang jong ki briew shimet lyngba ki sur jingrwai kiba la pynmih haka por election naka liang ka UDP Nongpoh circle ki la pynkup burom ruh ïaki nongrwai kiba la rwai naka bynta u kyrtong jong ka UDP bad ki la pynbna ruh ïaki nongjop naka bynta ki polling station ki ba bun vote lyngba ki percentage, ka Polling Station Jermanai ka la wan nyngkong, ka Umsaw Nongbri ba ar bad ka Mawryngkang kala wan ba lai bad la pynbna ruh ïa ki polling station kiba heh kiba ïoh ban wan shakhmat haka jingïoh bun tylli ki vote ha kaba ka Shnong Pahamsyiem ka la wan nyngkong, ka Umsaw Nongbri ba ar bad ka Polling station Diwon ka la wan balai bad naka liang u MLA u la pynbna ba un sa leit sha kitei ki Polling Station ban ai ïaki khusnam.
Haba kren ha kane ka sngi naka liang u Bah Mayralborn Syiem, u la pynpaw ka jingsngewnguh kaba kyrpang ïaka ki nonngkitkam naduh ka Nongpoh Circle, ki unit bapher bapher bad ïaka UDP Ri-Bhoi kaba la kynmaw tympang ban pyndon burom ïa u ha kane ka sngi. U la pynpaw ruh ka sngewkmen ban ïohi ïaka jingai mynsiem naki nongkyrshan ba ki la shanñiah bad ibit ban long biang u MLA jong ka Nongpoh Constituency.
Ka jingioh ïaka bor ka wan ruh ka jingkitkhlieh kaba khia la ong u Bah Mayral Born da kaba bynrap ruh ba ka seng UDP ha jylla ka khmieh lynti bad angnud ba ki paidbah jong ka jylla kin ai ka jingkyrshan kaba pura, halor ka jingthrang ban ïoh ïa u Myntri Rangbah na Ri Khasi, ki nongïalam ka UDP ki la leit ban tyrwa ïaki 45 ngut ki kyrtong ha khmat ki paidbah ba kin ai ka jingkyrshan ban pynurlong ïaka jingthrang ka seng, hynrei ka mon hi ka shong ha ki paidbah ïano ki ibit ban jied.
U la ong ruh, ka jingleit jong ka Party UDP ban ïasoh bad ka sorkar MDA ban thaw sorkar ka long ba hadien ka jingpyrkhat sani bha halor ka jingmyntoi jong u paidbah ba bun balang bad daka jingïa sngewthuh jingmut lang ki 11 ngut ki MLA UDP ha ryngkat ki nongïalam ka party ka la pynlong ïaka party ban leit synrop lang bad ka sorkar MDA.
U Bah Mayral u la ong, hapdeng ka jingeh bad ki maw jynthud ki ba bun ha kine ki 5 snem ba la leit ki paidbah jong ka Nongpoh Constituency kim shem la iehnoh ïaka party UDP bad ki la pyni ïaka jingshanñiah ïa u Bah Mayralborn da kaba bynshet biang ha u sa shisien ïaka lyngkor kum u Nongmihkhmat jong ka Constituency.
U la pynpaw ruh baka liang jong u kum u nongmihkhmat un nang ïai trei shitom shuh shuh ban wan rah ïaka jingkylla bad ka roi ka par sha baroh ki polling station kiba hap hapoh ka Nongpoh Constituency. U la kyntu ruh ïa ki nongïalam jong ka Circle bad ki Unit bapher bapher, ba ngim dei ban kput ïaki polling station kiba duna haka jing ïoh ïaka vote, hynrei ngi dei ban ïawer ban ïatrei lang ha kane ka kynti bad ngi dei ban wat ïaka daw tynrai iaki jingduna ban ïoh vote naki polling station bad ba ngin dang pynbha shuh shuh ha ki sngi ki ba dang wan.
Shuh shuh u kyntu ïaki Circle bapher bapher bad ki nongïalam ka UDP ha baroh kawei ka District ba ki dei ban dang ïai trei shitom ha baroh kine ki 5 snem bad kim dei ban shongthait noh tang namar ba la kut ka elekshon, da kaba bynrap ruh ba shibun ki jingkynthoh kin wan bad kin leit hynrei ngim dei ban pynsngap bad ngim dei ban pynsngap ïaki khubor ki ba thmu ban pynjot pynpra hynrei ngi dei ban tih bñiah bad ban wat ïaka jingshisha, kyntu u bah Mayralborn.