Khliehriat, Nohprah 03 : U MLA-2 jong ka Jowai Constituency, u bah Wailad Shylla u la pynhap pyrda noh ïa ka jingïalehkai phutbol , ka 25th Knockout Football Tournament 2024 ba la pynlong da ka Jalaphet Lumsashram Socio & Cultural Sports Club (JLSCSC) ba la pynlong ha madan Kdohmuid ha shnong Jalaphet East Jaiñtia Hills District hynin ka sngi.
Haba kren kum u kongsan, u bah Wailadmeki Shylla u la ong ba ka don shisha ka jingduna ha kiba bun ki bynta ha kaba ïadei bad kane ka madan football kaba don ha shnong Jalaphet bad ong ruh ba na ka liang jong u un pyrshang katba lah ban ïarap ban ïakren bad ka sorkar ban ïoh ki jingïarap kiba na ka sorkar lyngba ki skim na bynta ban shna pynbha ïa kane ka madan footboll, kum ki jingker kynroh, ban pynmadan bha ïa ka madan bad kiwei kiwei ki jingdonkam.
Haba phai pat sha ka jingïakhun final ha katei ka 25th Knockout Football Tournament 2024, ïa ka nam lah duh la ïoh rah da ka Samasi Football Club kaba la pynliem ïa ka Mistery Football Club da 1-0 kol, ka Samasi Football Club, kaba la rah nam jop ka la ïoh rah ruh ïa ka khung pisa kaba T1 lak tyngka bad ka Mistery Football Club ka la rah ïa ka khung pisa kaba T 50000 tyngka.
Related Posts
Ha kane ka sngi pynhap pyrda, ka Committee Sport ha ryngkat ka jingïatreilang bad ka Dorbar Dong Lumsashram ka la pynkupburom ïa ki rang ïalehkai football kiba rim kiba na ka dong Lumsashram kiba la noh synniang shibun ha ka kam ïalehkai da ki sap ïalehkai football jong ki myn ha ki por bad ki snem kiba la leit bad kiba la ju wanrah burom ruh ïa ka Club ha kito ki por bad ki snem ba la leit.
Ki rangïaleh football kiba shah pynkupburom ha katei ka sngi ki kynthupu bah Wom Chyrmang, u bah Saïa Chyrmang, u bah Ïaid Chyrmang, Salan Syrti, Shaw Syrti , u bah Rowell Syrti, u Plol Chyrmang, u Malum Chyrmang, Kordon Chyrmang, u bah Hon Chyrmang, Net Chyrmang bad u bah Goldstar Chyrmang.
Ïa ka prokram ha katei ka sngi la pynïaid da u rangbah dong Lumsashram, u bah W.Chyrmang.
Kiba la ïa don ryngkat lang bad sakhi ïa katei ka jingpynhap pyrda ïa ka 25th Knockout Football Tournament 2024, ki kynthup u MDC jong ka 24 Narwan Sutnga constituency, u bah Seibor Shadap, u bah Bishar Pala, u MDC barim, u bah Hopingstone Bareh, u Waheh Shnong Jalaphet Sumer, u bah Lambha Chyrmang bad kiwei kiwei ki riew rangbah.