Shillong, Nohprah 03 : Ka kol kaba wan na u Zothanpuia Bawihtlung ha ki minit ba khatduh shwa ban wai ka jingïakhun ka la pynlong ïa ka Nangkiew Irat SC ban khur suk ïa ka jingjop da 1-0 kol ïa ka Ryntih FC ha ka lympung ïalehkai jong ka Shillong Premier League kaba itynnad bha ha ka janmiet sngi Ba-ar ha madan SSA Stadium, First Ground, Polo, Shillong.
Hapdeng ka jingïakhun kaba mar ïa biang bor bha khamtam ha ki bynta ba khatduh jong ki lai minit shwa ban wai artad ka por ïalehkai u Zothanpuia uba mih naba shong ben u la ïoh ban khyrwit da ka free-kick kaba la pynlong ïa ka bol ba kan leit beit beit sha kol bad pynkhih ïa ka jar. Na ka liang u rangap kol ka Ryntih u Eric Nongkhlaw u la kyrda tyngeh hynrei um shym la lah ba khanglad shuh ïa ka bol.
Da katei ka jingjop, ka Nangkiew ka la don mynta ha ka kyrdan kaba san ha ka miej ïa khein point bad ïahap da mar 9 point bad ka Rangdajied United FC kaba don sa kawei ka jingïakhun ha khmat. Kine ki ar tylli ki kynhun kim pat ïa kynduh ban aireng watla ka Rangdajied ka la tam lypa da ka jingïoh thep bun kol (+5 la 0 kol).
Katba ka Ryntih ka don mynta ha trai duh jong ka miej kheiñ poiñ da ki 3 poiñ bad kane ka jingshah rem kadei ka sien kaba hynriew ban ban.
Related Posts
Na ka liang ka Ryntih ka la pyrshang lut ki lad ki lynti ban ïoh thep kol bad thaw ruh bun ki kabu naduh ba sdang tad haduh ban da kut ka por ïalehkai. Na ka liang u kapten ka kynhun u Dameki Khongstia u la ïalehkai tyngeh ha pdeng madan hynrei ka jinghap ban mih noh na madan namar ka jingmynsaw ka la ktah haduh katta katta ïa ka kynhun baroh kawei.
Ha ka kylla miet ka Ryntih ka la ïoh biang katto katne ki kabu ksiar khamtam lyngba u Leonardo Laloo uba khlem lah pat ban khyrwit tyngeh ïa ka bol ba kan ksam lyngba bad ïoh ban pynkhih ïa ka jar. La ïohi ruh kumno u Bauklang Bina u la pynher stet bha ïa ka bol hynrei namar ka jingtur jong u rang ap kol, kumta um shym la lah satia ban khyrwit bha ïa ka bol ban leit sha kol.
Tad haduh ban da jan wai ka jingïakhun, baroh ki la khmih lynti ba ka jingïalehkai kan kut ha ka jingïakhaid hynrei dei lyngba ka free-kick na u Zothanpuia kaba dei ruh ka kol kaba nyngkong jong u ha ka SPL watla u la ïoh ban thep teng saw kol ïa ka Nongkrem ha ka Second Division ha shwa ba un wan sha ka Nangkiew Irat.
Ka jingïakhun kaba bud pat kan long ha ka sngi Thohdieng, ha kaba ka Nongrim Hills kan ïakhun pyrshah ïa ka Langsning ha ka por 11:30 baje mynstep bud pat sa ka Nongthymmai SC pyrshah ïa ka Nangkiew Irat ha ka por 2:30 baje janmiet.