Nongstoiñ, Naitung 21: Ha ka sngi saitjaiñ ba la dep u bah Shakliar Warjri MLA ka Mawthadraishan, u ba bat ruh kum u Myntri ka tnad Sport & Youth Affair jong ka sorkar jylla, u la hiar sha ka shnong Mawlieh West Khasi Hills, ban don ryngkat ha ka final jong ka Knock out football tournament 2023-24 ba la pynglong da ka Jingïaseng Samla balang Presbyterian Mawlieh.
Ka jingpynlong jong ka Jingïaseng samla Balang Mawlieh ïa katei ka lynmpung ïalehkai phutbol, ka long ban pynmih fund na ka bynta ka Balang ha shuwa ba kan sa rakhe ïa ka jingdap Shispah arphewsan snem ha u snem ban wan. Ha katei ka lympung lajan baroh ki balang kiba hap hapoh ka Ditrict Mawlieh ki la wan ban ïashim bynta, hynrei kiba la poi sha ka bakut ban ïaknieh ïa ka nam lah duh ki dei ka Veteran Block I pyrshah ïa ka Veteran Block II.
Ha katei ka sngi shuwa ban sdang ïa ka final namar ka dei artad ka taïew ba kyrpang jong ka jingïaseng kynthei (Women Week) kaba la pynbeit da ka KJP Assembly, ka jingïaseng samla ka la pynlong ïa ka jingïalehkai paralok jong ki kynthei hapdeng ka jingïasengkynthei Balang Presbyterian Mawphansin pyrshah ïa ka jingïaseng Kynthei Balang Presbyterian Mawsaw, ha kaba ka Jingïasengkynhei Blang Mawphansin ka la jop da shi kol la nod.
Ha ka jingïalehkai ki rangbah hapdeng ka Veteran Block I pyrshah ïa ka Veteran Block II, ka Veteran Block II ka la jop noh da ka tie breaker kaba long san la saw kol.
Ha kane ka lympung, na ka liang ka Jingïaseng Samla ka la pynsngew ïa ka memorandum bad la aiti sha u Myntri ba un leh ïa kaba don kam. La ïoh ïa ka jingkren na u Tymmenbasan K.P.Pangñiang MLA barim ka Rambrai jyrngam u ba la shah khot kum u symbud kongsan.
Related Posts
U Tymmenbasan Pangñiang haba ai jingkren ha katei ka sngi, u la ong ba ka jingpynkhreh jong ka Balang Presbyterian Mawlieh ban rakhe ïa ka jingdap shispah arphewsan snem, ka long ka khubor kaba pynkmen bad kaba ai mynsiem ïa baroh ki paitbah jong ki Balang hapoh ka District Mawlieh.
U la ong ruh ba u ngeit bad sngewthuh ba ha ka jingïaid lynti jong ka Balang ha kine ki shispah arphew saw tylli ki snem, ka Balang ka la mad shibun ki jingeh bad ki khohruh khohram. Hynrei ka jingieit bad ka jingïalam lynti ka jong u Blei ka la pynlong ïa ka Balang ba kan nang kiew shaphrang ha ki liang baroh.
U bah Shakliar Warjri Myntri ka tnad Sport & Youth Affair u ba long u kongsan, u la ong ba ka jingpynkhreh jong ka Balang ban rakhe ïa ka jingdap shispah arphewsan snem, ka hap ban ïakynduh shibun ki jingeh hynrei haba ka Balang ka pynkhreh na ka bynta ka kam kaba bha kan long kaba seisoh lyngba ka jingkyrkhu ka jong u Blei Trai kynrad.
U la ong ruh ba kum u Myntri ba peit ïa ka tnad Sport ha u peit haman la ki jaka wat haduh ki nongkyndong, u lap ba ki don shibun bah ki samla kiba don ïa ki sap ki phong ba bun jait khamtam eh ka ki jingïalehkai. Nalor kata u la ong ruh ba kum u Myntri u la pynsngew ruh sha ka sorkar, ba ka por ka la dei ba ka sorkar kan pynleit jingmut kumno ban kyntiew ïa ki samla kiba don ka sap ïalehkai, ym tang ha ki jaka sor hynrei ban pynleit jingmut kham bun sha ki nongkyndong.
Namar ba ki samla na ki nongkyndong ki long kiba kham tbit bha ha ki kam ïalehkai bad u don ruh ka jingangnud ba ha kawei ka sngi, ki samla jong ka jylla kin ïoh ka lad ban poi shaduh ki lynpung ïalehkai Olympic bad kin wanrah ruh ka nam ïa ka jylla baroh kawei.