Pynhap pyrda noh u Dy CM ïa ka Meghalaya Games ba 6 hapdeng ka jingphuh jingphieng

Jowai, K’lyngkot 25: Ka Meghalaya Games kaba Hynriew, kala kut noh mynta ka sngi Saitjaiñ da kaba pynlong ïa ka jingïalang pynhap pyrda ha Kiang Nangbah Football Stadium ha Jowai. ïa kane ka jingpynhap ïa ka lama Meghalaya Games la leh da u Symbud Myntri Rangbah ma Sniawbhalang Dhar.
Kane ka jingkut noh jong kane ka tamasa ïalehkai kaba shi taiew, la sakhi ïa ka jingwan ïashimbynta palat 3500 ngut ki nongïalehkai kiba ïakob ha ki 29 tylli ki jait jingïalehkai.
U Symbud Myntri Rangbah ka jylla u Bah Sniawbhalang Dhar ula long u kongsan ha ka jingïadonlang u MLA ka Jowai u Bah Wailadmiki Shylla, u Working President ka Meghalaya State Olympic Association (MSOA) u Bah John F. Kharshiing, u Deputy Commissioner ka West Jaintia Hills District u Bah B.S Sohliya bad kiwei kiwei ki heh ophisar.
ïa kane ka Meghalaya Games la plie da u Myntri Rangbah ka jylla u Conrad K Sangma haka 21 tarik u Kyllalyngot ha kaba la ïadonlang u Myntri ka tnad Sports and Youth Affairs u Bah Shakliar K Warjri.
Ha kane ka lympung kaba mynta, ka East Khasi Hills kala rah ïa ka nam lahduh da kaba ïoh khur 149 tylli ki takma ksiar, 105 tylli ki takma rupa bad 127 tylli ki takma rnong bad baroh ki takma kiba la ïoh khur ki long 381 tylli. Ka WJH kala long ka First Runner Up da kaba ïoh khur 108 tylli ki takma bad ka Ri-Bhoi kala ïoh ïa ka Second Runner Up da kaba ïoh khur 104 tylli ki medal.
Ha kane ka 6th Meghalaya Games ka jingwan iahsimbynta jong palat 3500 ngut ki nongïalehkai kaba long kaba heh tam bad ha ka sien kaba nyngkong kila don 7 ngut ki Para-Athletes kiba la ïashimbynta lang ha kane ka Meghalaya Games.
U Bah John F Kharshiing, ula ong “95% na ki nongïalehkai kiba na rilum Garo kila ïoh ban sakhi ha ka sien kaba nyngkong eh ïa ka West Jaintia Hills lyngba kane ka lympung ïakob ïalehkai”.
U Ma Sniawbhalang Dhar ula pynpaw ka jingsngewkmen halor ka jingseisoh bad jingjop ha ka jingpynlong ïa kane ka Meghalaya Games bad ula iaroh ïa u Myntri Rangbah ka jylla, u Myntri ka tnad ïalehkai, u MLA ka Jowai bad ïa ki synjuk ïalehkai bapher bapher.
“Ngi sngewsarong ban ong, ba ngi la long kiba bit ba biang ban pynlong ïa ka National Games” ong u ma Sniawbhalang Dhar bad ka bynrap ba ka tnad ïalehkai kala kiew shaphrang bha hapoh ka jingïalam jong ka sorkar MDA kaba la kyntiew ruh ïaka jingpynlut ha ka ban tei ïa ki jingtei ki bapher bapher kiba ïadei bad ka kam ïalehkai. Ka jingthmu ban tei ïa ka Mawkhanu Football Stadium, kan dei kaba heh tam ha ka ri bad kane kan pynlong ïaka jylla Meghalaya kum ka nongbah jong ka jingïalehkai Football hapoh ka ri India.
Ha kane ka 6th Meghalaya Games, la kynthup ïa ka An’ding Oka ha ki 3 tylli ki Traditional Games ne ki jingïalehkai tynrai, ïa kaba la ïalehkai da 87 ngut ki samla ka Meghalaya, ka khana shaphang u Banshanlang Khyllait, ha kaba ka ïing ka sem jongu baroh kala ïashimbynta ha ka Cycling, ka nongialehkai Football ka Sanfida Nongrum kaba la trei shitom bha da ka jingdon ïaka jingangnud ban ïoh mihkhmat ïaka ri.
U Bah Wallambok Lyngdoh, u Head Coach ka Meghalaya Sport Climbing and Mountaineering Association, ym tang ba ula ai jinghikai ïa ki nongïalehkai ha ka U-16 hynrei ula ïalam ruh na khmat ha kaban ïoh pdiang ïa ki khusnam ha ka jingleit mihkhmat ïa ka jylla Meghalaya.