Nongstoiñ, Naiwieng, 11: Ka St. Francis D’Assisi College Siejlieh ha ka sngi palei jong ka taïew ka la pynhap pyrda noh ïa ka taïew lehkmen jong ki samla pule ne ka College Week, ha kaba la don ryngkat ban pynhap pyrda da u MLA ka Nongstoiñ u bah Macmillan Byrsat kum u Kongsan.
Nalor u Kongsan ha kane ka sngi la ïadon ryngkat lang ruh u DSP HQ ka WKHD u bah B. Kharjana kum u Symbud kongsan, u Bro Collinsius Wanniang Principal jong ka College, ki nonghikai ki samla pule bad kiwei kiwei kiba la shah khot sngewbha.
Ha katei ka sngi pynkut noh ïa ka taïew lehkmen ki samla pule jong katei ka College, ki la don shibun ki prokram ban pynbyrngia da ki samla pule naduh ka rïaw ka siaw, ka shad ka tem bad kiwei kiwei dei ki jingïakop ha kaba u kongsan bad symbud kongsan ki la ïoh ruh ban sam ïa ki khusnam sha ki nongjop.
Na ka liang u kongsan haba ai jingkren u la pynpaw ïa ki kyntien kyrkhu kyrdoh sha ki samla pule jong ka College, ba kin nang kiew shaphrang ha ki jingthmu jong ki. U la ong ba ka pule puthi ka dei kaba kongsan tam ha ka jingim briew. U kyrmen skhem ruh ba lyngba kane ka College kin sa mih ki samla kiba tyngshaiñ ha ka dong ka thaiñ bad ha ka Jylla hi baroh kawei.
