Shillong, Lber 19 : Ka National Institute of Fashion Technology, Shillong ha ka sngi Saitjaiñ ka la pynhap pyrda noh ïa ka Spectrum 2023 ba arsngi da ka rynsan pyni nam ïa ki riam ba harukom nalor kiwei kiwei ki prokram.
Ha kane ka sngi la donlang ruh u ADG jong ka NCC NER Shillong, u Maj General Gagandeep kum u Kongsan kumjuh kii bor pynïaid jong ka NIFT Shillong nalor ki samla pule na ki college bapher bapher kiba wan na kylleng kylleng.
Ki nongshim bynta ha katei ka prokram ki la sei pyrthei ruh ïa ki jingpynwan dur ba harukom ïa ki riam la ka long ha ki riam tynrai, ki riam kajuk mynta bad kiwei kiwei. Na bynta ki nongjop ha katei ka lympung, ki bor pynïaid ki la pynkup burom ruh da ka khusnam pisa kumjuh ki jingbuh sahkynmaw.
Haba kren ha katei ka sngi, u Kongsan u la kren ruh ba kumno ka riam ka beit mynta ka ïaid ryngkat ryngkat bad ka juk khamtam ha kane ka thaiñ shatei lam-mihngi jong ka Ri kaba don lut ki jingïapher ha ki rukom im.
U la ai ruh ka jingïaroh ïa ka NIFT Shillong kaba la lah ban pynlong ïa katei ka prokram kaba shongkun ha kine ki ar sngi bad ai ruh ka jingïaroh ïa ki samla pule bad ki nonghikai jong katei ka jaka pule kiba la lah ban pynlong ia katei ka lympung kaba jop bad kaba seisoh.
Na ka liang u Campus Director, u Shankar Kumar Jha haba ai khublei ïa baroh kiba wan ban shim bynta na ki college bad ki skul bapher bapher u la ong ba ha ka snem ban wan ki khmih lynti ba kin lah ban pynlong ïa katei ka lympung kaba kham heh shuh shuh.
Lah ban kdew hangne ba ha ka sngi sdang jong katei ka lympung ka la don ruh ka jingpyni nam ïa ki tiar trei kti bapher bapher la ka long naduh ki jain ba shu thaiñ, ki nongoh shrong, ki nongshna tiar na ki siej bad kiwei kiwei na kylleng ki jylla jong ka thain shatei lam-mihngi jong ka Ri.
