Pynhap pyrda ka Kur Mawrie ïa ka phutbol ban kynmaw burom ïa Rangbah Kur, (L) Bah Dring Mawrie
Shillong, Risaw 25 : Ka Kur Mawrie Sports & Cultural Club, Laitkor ha ka 22tarik mynta u bnai ka ka la pynhap pyrda noh ïa ka Kur Mawrie Football Tournament ba la ai nam ha kyrteng u mynta u (L) Bah Dring Marcel Mawrie kaba la pynlong ha madan phutbol Laitkor Pyllun.
Ha kane ka lympung ki la don 12 tylli ki kynhun ïalehkai jong ki Kur na kylleng sawdong ki shnong jong ka Bri u Hynniewtrep ïa kaba la plie pyrda naduh ka 08 tarik Risaw 2022.
Ïa ka nam lahduh ha kane ka Kur Mawrie Memorial Football Tournament la jop da ka Kur Mawrie Laitkor Wahshohkha bad ka la ïoh rah ïa ka song pisa kaba 20,000 tyngka ryngkat ka khusnam katba ïa ka ka nam ba-ar la ïoh ban rah da ka Kur Mawrie Laitkor Rngi kaba la ïoh rah ïa ka song pisa kaba 10,000 tyngka.
Ïa ka nam rangïalehkai ba kynsai la rah da u Samla Ïainehskhem Mawrie na ka Kur Mawrie Mawshbuit bad ïa ka nam nongap kol ba tbit la rah da u Samla Kambantei Mawrie na ka Kur Mawrie Laitkor Wahshohkha bad ka nam nongthep kol bun tam la rah da u Samla Rovison Mawrie na ka Kur Mawrie Laitkor Wahshohkha.
Ha kawei pat ka liang ka Seng Samla Kur Mawrie ka pyntip ba kan ai khusnam kyrpang ïa baroh ki Samla Kur na kylleng sawdong ka bri u Hynniewtrep ïa kito kiba pass bha ha ka Exam SSLC bad HSSLC kiba ïoh 75% shaneng jong u snem 2021 bad 2022.
Ha kane ka sngi la pynkup burom ruh ïa ka kyrteng bad ka nam jong u (L) Dring Marcel Mawrie da kaba ai ïa ka Syrnod Sahkynmaw ha ki Khun na ka Kur ka jait Khyriem kum ka dak ka jingburom ïa I (L) Dring Marcel Mawrie ba la noh synniang shibun eh na ka bynta ka imlang sahlang namar ba la shakri ïa ka kam jong u Blei kum u Secretary banyngkong eh jong Balang Katholik Divine Saviour Parish Nongthymmai naduh u snem 1976 haduh u snem 1998 bad la trei ruh ïa ka kam shnong kam thaw kum u Rangbah Shnong jong ka Shnong Nongthymmai Nongshiliang naduh u snem 1989 haduh u snem 2000. Ki Nongïalam Kur ba la ïadonlang ha kane ki sngi ki long I Bah Bini Mawrie Rangbah Kur, Bah Leonard Arun Mawrie President, Bah Ernest Mawrie Working President nalor kiwei kiwei ryngkat ka jingdonlamg ki khun ki kti jong utei u rangbah nalor u Acting Syiem ka Hima Mylliem, Paiem Ainam Manik Syiem.
Kane ka long katkum ka kyrwoh ba la phah da u Bah Bikson Roy Mawrie President Seng Samla Kur Mawrie.