Pyndep ka Raid Marwet ïa ka kñia ka khriam ban ainguh ïa u Blei Nongbuh Nongthaw ha ka lehñiam Sohjer

Nongpoh, Kyllalyngkot 19: Kumba la buh naduh ki mynbarim, ki longshuwa ki manshuwa ban pyndep ïaka ñiam ka rukom, ka kñia ka khriam, ki khun ki hajar jong ka Raid Marwet mynta ka sngi kila pyndep ïaka jingkñia ainguh ba shisien shisnem ïa u Blei nongbuh nongthaw haka lehñiam Sohjer ba u Blei un kyrkhu kyrdoh ïaki khun ki hajar baroh shisnem khamtam hadien ka jingioh kheit ïa u soh ba nyngkong jong ka jingtrei shitom jong ki baroh shisnem.
Ïa katei ka lehñiam Sohjer kaba la sdang naduh ka 17 tarik ha kaba la don shibun ki jingleh niam bapher bapher bad mynta ka sngi ka Raid Marwet ka la lah ban pyndep noh ïa baroh ka lehniam leh rukom ban pyndep ïa kata ka khña ka khriam ba la sim bynta kum u kongsan da u Paiem Ken Syiem, Syiem ka Raid Marwet kum uta u paiem ban pyndep ïa ka niam ka rukom bad ka kñia ka khriam katkum ka riti ka dustur jong ka Raid Marwet
Nalor ki khun ki hajar jong ka Raid Marwet, ha kane ka sngi ba la pynkut pynwai noh ïa kane ka Shad Sohjer ka Raid Marwet la sakhi lang ruh da ka jingdon lang u Nathaniel Thangkiew, uba dei u Basan Nongkseh, Myntri K Langstieh naka Hima Mylliem ryngkat ki longsan mansan ka Raid Marwet kila shim bynta lang ha ka knia ka khriam ban pyndep ïaka jingainguh ïa u Blei ha katei ka jingleh ñiam ka ba la long ha Baridua.
Lyngba katei ka lehñiam bad ka tamasa lah ban sakhi ïaka jingriew spah jong ka kolshor tynrai jong ka Raid Marwet bad lyngba katei ka lehñiam yn sa lah ruh ban pynim biang ïaki shad tynrai, ki bam tynrai bad ka kñia ka khriam kumba la buh da ki longshuwa manshuwa bad ka ainguh ïa u Blei Nongbuh nongthaw ba un theh ki jingkyrkhuh ïaki khun ki hajar jong ka Raid Marwet.
Kumba la pynpaw da u Paiem ka Raid Marwet, u Paiem Ken Syiem, la ong ba ka jingpynlong ïa kne ka leh niam Shad Sohjer kam dei satia tang ban ai ïa kata ka nguh ka dem sha u Blei hadien ba baroh shi snem u la ri la sumar bad u la ai ka bam ka dih bad khamtam ba ki la ioh pdiang ïa ki jinglum jinglang na ka rep ka riang hadien ban ot bad ban lum ban lang, hynrei kane ka Shad Sohjer ka dei ruh shi bynta ban pynneh pynsah ïa kane ka lehniam tynrai kaba ka Raid Marwet ka pyni sha ka pyrthei ba ka riewsphah halor ki riti ki dustur bad ka leh niam ka leh rukom tynrai.
Na ka bynta ka shongsuk shongsain hapoh ka Raid, u Paiem Ken Syiem u la khot la wer ruh ïa ki khun ki hajar ban don ka jingïatrei lang ym tang ha kaba pynneh pynsah ïa ki riti ki dustur, hynrei ban wan rah ïa ka shongsuk shong shong sain khnang ba ki khun ki hajar hapoh ka Raid kin nang kiew shaphrang ha baroh ki liang jong ka jingim jong ka jinglong briew manbriew, u la bynrap.