Jowai, K’Lyngkot 19 : Namar ka jingtreikam jong ka model code of conduct na ka daw jong ka Assembly election, kumta u District Magistrate ka West Jaiñtia Hills ha ka jingpynmih hukum mynta ka sngi katkum ka kyndon 144 CrPC la khang ïa kino kino ki riew shimet ne ki kynhun ban rah pisa ha lade haduh Rs.50,000/- (Sanphew hajar) tyngka hapoh ka District.
Kane ka hukum kan treikam naduh ba la pynmih ïa ka bad kan bteng haduh ban da dep ka elekshon.
Ha kawei pat ka hukum u District Magistrate ka West Jaiñtia Hills ula pynmih ba la khang ban dro ne thoh dak ha ki kynroh rud surok ne ha ki kynroh jong ki riew shimet, namar bunsien kane ka wanrah ka jingujor na ka liang jong ki trai kynroh bad ka wanrah ka jingbym ïasngewthuh jingmut hapdeng ki para nongshong shnong.
Ym shah ruh ban pynlong ïa ki rali ne ki jingïaid proseshon nangta ka jingwah ïa ki banar ba heh ne barit yn shah tang lada ïoh bor shwa na ki trai ïing ryngkat ka jingaibor na ka ophis jong u DC.
Yn ym shah ban pynlong kino kino ki jingïalang paidbah khlem da ïohbor na ka ophis jong u DC bad ruh na u Waheh Shnong jong kato ka jaka ba thmu ban pynlong jingïalang paidbah. La khang ruh ban pynsawa ïa ki kor sawa (PA System) hapdeng ka por 10:00 PM haduh 6:00 AM.
