Shillong, Kyllalyngkot 19: Ka Sorkar Jylla hynne ka sngi Thohdieng ka la rai ban pynduh noh ïa ka Meghalaya Civil Task Force Act, 1974.
Haba iakren bad ki nongthoh khubor, u Myntri Rangbah ka jylla u Conrad K Sangma , ula ong ba ïa ka Meghalaya Civil Task Force Act la thaw naduh u snem 1974.
“Namar ba ki la don ki jingkylla ha ka rukom treikam bad ka jingshisha ka long ruh ba ïa katei la donkam ha katei ka por bad haba la thaw ïa ka Meghalaya Civil Task Force ka long kaba ïapher bad kine ka sngi jong ka pyrthei mynta bad ka task force kam long shuh kaba donkam haduh katta katta ha kaba baroh ki nongtrei jongki tnad bapher kila pyndep ïa baroh ki jingdonkam bad ma ki baroh ki la lah ban shongthait na ka kam ne ki la shim ïa ka VRS” ula ong.
“Kumta katei ka Act ka la long ka bym donkam shuh bad kumta ban pynthika ba kan ym don kano kano ka kynrum kynram, ka kynhun myntri mynta ka sngi ka la rai ban pynduh noh ïa ka bad ki la don 3 tylli ki Post kiba la don bad ïa kine yn sa pynrung noh ha ki tnad sorkar ha kiwei pat ki kam bad ïa kane ka jingpynduh noh ïa kane ka aiñ yn sa rah ha ka ïingdorbar thawaiñ jong ka jylla” ong u Myntri Rangbah.
Ha kawei pat ka liang ka Kynhun Myntri ka la ai jingmynjur ïa ka kyrteng ki ban ïoh pdiang ïa ka Meghalaya Day Award bad ïa kane yn sa pynbna paidbah ha ka jingrakhe ïa ka Meghalaya Day ha Tura.
Nalor kane ka Kynhun Myntri ka la ai jingmynjur ruh ïa ka thup kyrteng jong ki heh sorkar ki ban pynher ïa ka lama jong ka ri bad ban shim ïa ka Salute ha ka jingrakhe ïa ka Republic Day ha ka 26 tarik u Kyllalyngkot ha ka jylla.
