Shillong, Nailar 29 : Ka Meghalaya High Court ha ka sngi Nyngkong ka la pyndam noh ïa ka public interest litigation (PIL) ba la ujor da u nongai ktien ka All India Trinamool Congress (AITC) u Saket Gokhale da kaba ong ba ka khlem don satia ka jingshah ot bording baroh shishnong.
Da kaba pynpaw ba ïa katei ka jingujor la buh da namar kadei na ka bynta ka jingbha u paidbah hynrei la paw pat ba kadei namar ba la jan ka elekshon.
U Gokhale ha ka jingujor u lakynnoh ba ka Meghalaya Energy Corporation Limited (MeECL) bad Meghalaya Power Distribution Corporation Limited (MePDCL) ki la ot bording ïa kawei ka shnong na ka daw ba ki katto katne ki nongshong shnong kim shym la siew ïa ka bai bording.
Na ka liang u Advocate-General haba ïasaid na ka bynta kitei ki tnad kynthup lang ïa ka sorkar jylla u la pyntip ba kam shym la don satia kano kano ka jingot bording kumba la ujor.
Katkum ka jubab laong ba ki transformet ha kylleng ki bynta jong ka South Garo Hills kynthup ha Kalibari ki la shah pynjulor lut na ka daw ka jingpom pyrthat bad kumta ki la julor bad la donkam ban maramot ne bujli noh.
Katkum ka jingong jong ka sorkar jylla, katei ka kam kan shimpor sa katto katne hynrei ha kiba bun ki jaka, kitei ki tranformer ki la dep maramot lane la buh da kiba thymmai bad ka jingpynpoi bording sha kitei ki jaka ruh la dep.
