Ban pynkynmaw ïa ka rai thung kam pura noh bad ban pynlait ïa ka arrear ïakhih ki nongtrei MeECL

0

Shillong, Nailar 29: Ki nongtrei casual jong ka MeECL hapoh ka shatri jong ka MeECL Progressive Workers Union(MePWU) kaba hap hapoh ka Cordination Comittee of Registered MeECL(Employees) association and Union (CCORMAU) ha ka sngi nyngkong ki la sdang ïa ka jingïakhih jong ki da kaba deng lama ïong ha baroh ki jaka trei ban dawa na ka sorkar ba ka dei ban pynurlong ïa kaba ki dawa ban thng kam pura noh ïa ki bad kumjuh ban pyllait arrear jong ki.
Haba kren sha ki lad pathai khubor u President Mantiphrang Lyngdoh Kiri jong ka MePWU u la ïathuh ba kane ka jinghap mih ïakhih ka dei namar ka jingbym seisoh ka jingdawa jong ki ba ka sorkar ka dei ban pynrung noh ïa ki nongtrei casual kum ki nongtrei pura wat hadien 20 ne 30 snem ba ki la trei. U la ïathuh ruh ba ka union ka dawa ba ka dei ban pyllait noh ïa ka arrear kaba dang sah namar kiba bun ki nongtrei kim shym la ïoh ïa ka arrear bad u la ïathuh ruh ba ki don kiba khlem ïoh satia wat tang khyndiat percent na kaba ki dei ban ïoh.
“Kumba ha ka por u Jisu kito kiba donkam jingpynkhiah na u ki ong, lada me mon me lah ban pynkhiah bad u Jisu u la jubab ba u mon ban pynkhiah ngi ruh ki nongtrei hapoh ka shatri MePWU ngi ong ïa ka sorkar lada phi don ka mon phi lah bad phi don ruh ka bor ban pynurlong ïa kaba ngi dawa” u la ong.
Haba bynrap lang na ka liang u Bah Arju Dkhar Vice President ka CCORMAU u la ong ba ka sorkar kam dei ban pynslem shuh ban pynurlong ïa ka jingdawa jong ki nongtrei casual namar ki nongtrei ki don kiba trei naduh ki snem 1980 bad ka dei kaba shong hok shong nia namar ki la trei da ki bun bun snem.
U la ïathuh ruh ba bar oh ki nongtrei casual kiba trei hapoh ka MeECL ki don kumba 2,000 eiei bad ki la dei ki budlum jong ka tnad, “na kata ka daw ka dei hok ba ki dei ban ïoh ïa kaei kaba ki dawa” u la ong.
Shuh shuh u la ïathuh ruh ba na ka liang ka CCORMAU ki la dep ban leit ïa kynduh bad u CMD jong ka MeECL bad ruh bad u Symbud Myntri Rangbah ka jyla uba peit ïa ka tnad bording ban pynsngew ïa ka mat jingdawa bad na ka liang jong ki, ki la ai jingkular ban pynurlong hynrei namar ka jingbym urlong haduh mynta bad ka jingsuki than ban pynurlong ïa kaba la kular ba ki mih sha khmat ban pynkynmaw ïa kaei kaba ki la rai ha ka jingïakren bad kiner ki heh sorkar.
U la ong ruh ba ha ka jingïakynduh bad kitei ki heh sorkar la rai ba ïa kito kiba la trei 12 snem sha neng yn thung pura noh kum ki nongtrei bad kaei kaba ki dawa ruh ka long ban thung pura ym shisien thung ïa baroh hynrei ban thjung nyngkong da kito kiba la trei kham slem ha kane ka tnad u la ong.
Na ka liang ka CCORMAU ki la rai ban pynlong ïa ki jingïakhih deng lama ïong naduh ka sngi nyngkong haduh ka 31 tarik Nailar bad kin sa pynlong ruh ïa ki jingïakhih shong kyllaiñ myngngor naduh ka 5 tarik Nailur haduh 16 tarik bad ha kane ka jingïakhih yn wan shim bynta tang kumba 50 haduh 100 ngut man ka sngi khnang ba kan ym don jingthut ka jingpynpoi bording sha ki paidbah ka jylla.

Leave A Reply

Your email address will not be published.