Shillong, Risaw 13 : Ka jingbun palat kiba pyrshah la ka long naduh ki nongïalam balang haduh ki seng bapher bapher, u Myntri ka tnad Taxation jong ka sorkar jylla, James K Sangma ha ka sngi Palei u la pynbna ba ka sorkar kan sa pyndam noh ïa ka aiñ Khalai lane ka Meghalaya Regulation of Gaming Act, 2021.
“Ha kine ki bnai ba la dep ki la don bun kiba pynpaw ïa ka jingsngewkhia haba ïadei bad katei ka ain. Nga la dep ruh ban kynduh ïa bun ki kynhun kynthup naduh ki nongïalam balang, ki nongïalam shnong kumjuh ïa ki seng bapher bapher. Dei ha kitei ki jingïakynduh ba nga sngewthuh ïa ka jingsngewkhia kaba ki paidbah ki don haba ïadei bad ki jingktah ba katei ka aiñ ka lah ban wanrah,” ong u Myntri ha ka kyrwoh.
Shuh shuh u al ong ruh, “Dei lyngba kitei ki jingïakynduh bad ki jingïathir sani ba nga sngewthuh shai ba na ka bynta ka jingbha lang ha ka jylla bad ka imlang sahlang ba ka la bha ban pyndam noh ïa katei ka Act khnang ba kan ym don kano kano ka jingktah. Kumta, kadei ruh ka jingkwah jong ka ban ïohi ba ïa ka Meghalaya Regulation of Gaming Act, 2021, dei ban pyndam noh.”
Ha kajuh ka por u Myntri u la pynpaw ruh ka jingsngewnguh ïa baroh kito ki nongïalam bad ki kynhun bapher bapher kiba la mih shakhmat ban pyni ïa ka jingsngew jong ki sha ka sorkar haba ïadei bad katei ka Act. U ong ruh ba dei ki nongshong shnong ka jylla kiba dei ka bynta ba kongsan ha ka synshar paidbah bad kane hi ka pynkhlaiñ na ka bynta ban ïoh ïa ka synshar khadar kaba paka haba ïa ka rai jong uba bun ba lang la pynsngew.
Shwa kane, u Myntri u la ong ruh ba ka thong jong katei ka aiñ khalai kaba la wanrah ha u 2021 kadei ban kyntiew ïa ki kam jngohkai pyrthei, nangta ban kyntiew ïa ka khajna bad ruh ïa ka ïohkam ïohjam ha ka jylla. U ong ruh ba ka jingthmu nyngkong ban wanrah ïa ka Casino ruh kadei tang na ka bynta ki nongwei kiba wan jngohkai sha kane ka jylla.
Lah ruh ban kdew hangne ba katei ka rai kaba u Myntri u pynpaw kadei hadien katto katne sngi ba ka kynhun ki nongïalam balang ki la pynlong da ka jingduwai kyrpang ban pyrshah ïa katei ka aiñ da kaba ong ba lada ithuh da ka ain ïa kitei ki kam khalai kan ktah jubor bha ïa ka imlang sahlang baroh kawei.
