Ka rai ban pyndam ïa ka aiñ khalai ka dei ba ki tieng ïoh rem ilekshon: Robertjune

Ki la wan thong sbai laisien ban kyrshan Casino: HITO Donkam da ka jingthoh:Revd. Kharkongor

0

Shillong, Risaw 13: Ka sorkar ha ka sngi Palei ka la pyntip lyngba u Myntri ka tnat Taxation u James Sangma ba la rai ban pyndam noh ïa ka aiñ khalai ne Meghalaya Regulation of Gaming Act, 2021 ba ka la wanrah. kane ka rai ka sorkar ban pyndam ka long hadien ba ka mih ka jingpyrshah na kiba bun ki lïohng ba kynthup naduh ki seng bhalang, ki nongïalam niam, ki khlieh nongsynshar bad ki riew paidbah.
Haba kren bad u President ka HYC u bah Robertjune Kharjahrin u la ong ba ka daw hi ba ka sorkar ka shim ïa kane ka sienjam ka dei namar ka jingtieng ïoh kan rem ilekshon ym namar ba ka sngap eh ïa ka sur u paidbah.
“Ban ong ba kane ka rai ka sorkar ka dei namar ka jingsngap ïa ka sur u paidbah kan bakla namar lada phi peit kaei kaba ki paidbah ki dawa kum ka ILP,ban rung ka ktien Khasi ha ka Khyrnit ba phra ka riti synshar ka ri, ban pynshitom ïa kiba bam sap ngi ïohi ba ka sorkar kam leh eiei bad kane ka rai ban weng hi ka dei beit ba ki tieng ïoh kin rem ilekshon namar ka samoi jied nongmihkhmat ruh ka la jan” u la ong.
U la ong ruh ba kane ka jingong ka sorkar ba kan weng ïa ka aiñ khalai kan dang dei hi tang ka ktien bad na ka liang ka HYC hi kam pat lah ban shaniah tylli ha ka sorkar amar bunsien kaei kaba ka kren ka ju long markhongpong ïa kaba ka leh.
“Phin sngap ïa kaei ba u Myntri Rangbah bad u Symbud Myntri Rangbah ki kam ba kin ym ïaid sha khmat shuh ban wanrah ïa ka casino hynrei na ka liang ka sorkar ka la ïaid shakhmat ban ai licence wat ban thung ïa ka expert committee na bynta ban wanrah ïa kane ka aiñ khalai bad ka casino bad kat kum ka jinglap jong ngi lyngba ka RTI, namarkata kum ka seng hi ka eh than ba ngin shu ngeit na kaei kaba ki kren tang ka ktien”, u la bynrap.
U la ong ruh ba kane ka jingleh ka sorkar naduh kaba sdang ban wanrah ïa kane ka aiñ ka la dei ka jingleh donbor ha kaba na kaba sdang la wanrah ïa kane ka aiñ ha ka dur ka ordinance bad ong ruh ba ka dei ka jingleh lutphut suda namar ka la thung da ki komiti bad siew tulop ruh sha ki. Na ka liang jong u u la ai jingmut ruh ba ka dei banphah pynphai biang noh ïa ka tulop jong ki dkhot kane ka komiti ba ka thung.
Shuh shuh u la ong ban pyndam ïa kano kano ka aiñ donkam biang ban wanrah da ka aiñ ban pyndam ïa kata ka aiñ la ha ka dur ka ordinance ne ka aiñ ba la mynjur da ka ïing dorbar thaw aiñ.
“Dei tang lada ka sorkar kan wanrah ïa ka ordinace ne khot ïa ka dorbar kyrpang ban mynjur ïa ka aiñ ban pyndam ba kane ka aiñ khalai kan ïap shisha hynrei kumba long mynta kadei beit tang ka tien kaba u myntri u kren sha ki lad pathai khubor” u la ong.
Shuh shuh u la ong ruh ba ka jingmih shakhmat lang jong ki kynhun bapher bapher ban dawa ïa ka juh ka mat kum ha kane ka kynti ba mynta ka dei tang ma ka lynti ïa ka jaidbynriew ban ïoh ïa ka jingdawa kiba ngi angnud a ka sorkar.
Shuh shuh na ka liang jong u u la ai jingmut ba ka sorkar kan pynkhlaiñ ïa ka aiñ The Meghalaya Prevention of Gambling Act, 1970 ban khang syndon sbak ïa ki jait jingkhalai baroh khoit lada dei ki online ne offline ruh kumba leh ka sorkar Tamilnadu.
Haba ïakren bad u President ka HITO u Bah Donbok Dkhar ruh u la pynpaw ïa kajuh ka nongrim ba katba kam pat don kano kano ka jingwanrah da ka jingthoh na ka sorkar ba ka la pyndam ïa kane ka aiñ na ka liang ka HITO kan ym pat shong kli kti noh ban ïakhun pyrshah ïa kane ka aiñ namar bunsien ka kam bad ka ktien ba la kren da ka sorkar ki long markhongpong.
Haba kren lyngkot halor ka jingïaid lynti kum ka seng ban pyrshah ïa kane ka aiñ u Bah Donbok u la ïathuh ba na ka liang ki briew ka sorkar ki la wan ban pynbieit ïa ki dkhot ka seng bad ïa u ruh da ki sbai bad ka tyngka ba kin shong khop noh na ka jingïapyrshah ïa ka aiñ khalai.
“Nga kwah ban ïathuh shai ba na ka liang ki briew ba la phah da ka sorkar ki la wan pynbieit ïa nga ha ka ophis jong ka seng ki wan laisien lai wat ban thong ban ai kam, ka tyngka bad kiwei dei ki jait jingphon jong ka sorkar hynrei na ka liang jong ngi ngi kren shai ba em te em,” u la ïathuh.
Shuh shuh u la ong ba ha kane ka jingwan thong ba laisen laiwat hynrei ynda ki la sngewthuh ba kim lah ban thied tad ki la kren kop ba na ka liang ka sorkar kan ïaid sha khamat ban wanrah casino lada ym mynta ka samoi ka ïing dorbar thaw aiñ hynrei ha ka samoi ban wan kan wanrah beit ïa ka casino lada ka NPP ka dang wan ha ka bor.
U la ong ruh ba kane ka rai kaba la shim da ka sorkar ka dei ka jingseisoh jong ka jingïatylli bad ka jingieng ha ka hok bad ka nongrim.
U Revd. Dr. EH Kharkongor, u la pynpaw ka jingkmen ba ka sorkar ka thmu ban pynduh pyndam noh ïa kane ka aiñ ïakhalai ne ka Meghalaya Regulation of Gaming 2021, hynrei u la ong pat ba donkam ban donkam ban pyni da ka kam ruh, ym dei tang da ka jingkren.
Haba ïakren bad u Nongthohkhubor hadien ba u Myntri ka tnad khajna, u James Sangma, u la pynbna ba u kwah ba ka sorkar kan pynduh noh ïa kane ka aiñ, u Revd. Kharkongor, uwei na ki nongïalam ka Khasi Jaiñtia Church Leaders Forum (KJCLF), kaba long ka kynhun ban pynlong da ka jingduwai ha ka 7 tarik mynta u bnai ha ïingmane English Service jong ka KJP Assembly ha Khyndailad, u Pastor Edwin Kharkongor, u la ong ba ka sorkar kadei ban pyni da kino kino ki dak la ka long ha kano kano ka rukom ruh, khnang ba kan nym pynsahnud ïano ïano ruh.

Leave A Reply

Your email address will not be published.