Shillong, Risaw, 13: Ka BJP Meghalaya State Unit ha ka sngi Palei ka la pynbna ba kan sa pynlong shen da ka jingïalap pyrshah ïa ka jingjyllei ba isaitmet jong u drok ha ka jylla Meghalaya baroh kawei.
“Ngi kyntu ïa ki nongïalam bad ka BJP kan sa pynbna shen kumno ban rat dyngkhong ïa ka jingjyllei jong u drok ha Meghalaya,” ong u State President ka BJP u Bah Ernest Mawrie.
“Dang shen haduh 40,000 kilo antad u drok ba la ïoh kurup da ka Narcotics Control Bureau bad kiwei kiwei tnat treikam jong ki jylla ka thaiñ Shatei Lammihngi la pynjulor noh ha ka sngi Saitjaiñ, 8 tarik, Risaw, 2022 ha kaba la sakhi lang lyngba ka Video Conference da u Myntri ka tnat Kam Pohing ka Ri u Amit Shah ha ka jingïalang kaba la long ha Guwahati,” ong u Bah Mawrie.
“Kane ka shisha ba ka Sorkar Pdeng ka la anngud ban rat dyngkhong ïa ka jingjyllei jong u drok ha ki jylla ka thaiñ Shatei Lammihngi bad kumjuh ruh ïa ka jylla Meghalaya ha kaba bun ki longing bad ki briew ki la shah ktah bad shah pynjot na ka jingim kyrni ha u drok,” la bynrap u Bah Mawrie.
U la ïathuh ruh ba dang shen ïa ka iing building ba ju pynlong ktem rieh tngen da ki nongdie drok kaba hap hapoh u pud u sam jong ka Shillong Cantonment Board bad ha ka Constituency jong u MLA ka BJP u Bah Sanbor Shullai la pynpra da ka puhshilum. “Ka party jong ngi ka kyrshan ïa kane ka jingleh jong ka Ministry of Defence,” u la ong.
“Kane ka dang dei tangka jingsdang bad ka BJP ha Meghalaya kan ai jingkyrshan ïa ka Sorkar Pdeng ban ïai bteng ban peitngor ïa kane tad haduh ban da ïoh pynkhuid naduh tyllong,” la ong shuh shuh u Bah Mawrie bad bynrap, “ym pat don kano kano ka Sorkar haduh mynta ban tem ïa ka jingjyllei jong u drok ha Meghalaya.”
U la ïathuh ba ki nongtrei jong ka BJP kin sa leit rung ha manla kawei pa kawei ka thliew ing ban ïasyllok bad ka BJP kan pynthikna ba ka jylla Meghalaya kan lait luid na ka jingshah tehmraw ha u drok da ka jingkyrshan ïa ka Sorkar BJP ha ka jylla bad ha Delhi.
