Shillong, Nailur, 19: Ki runar ki bym lah satia ban ithuh durkhmat ki la pynap da ka tari na ryndang ïa kawei ka khynnah skul bad tangon ruh da u maw na ka durkhmat haduh ba kan da mynsaw jur. Kane ka khynnah skul ka la shu lait im da ka said na ki tyrsim jong ka jingïap.
Kane ka la jia ha ka step sngi Baar katba kane ka khynnah skul kaba la 19 snem ka rta ka dang mih na ing ban leit sha skul hynrei ha shiteng lynti ka la shah khang kdong ha ki runar kiba la pynap ïa ka da ka tari na ryndang bad shoh haduh ba kan da mynsaw jur.
Namar ka jingjur ka jingmynsaw la pynkynriah noh ïa kane ka khynnah skul na Civil Hospital Mairang sha Civil Hospital Shillong.
Ka khubor ba la ïohlum, ka ïathuh ba kane ka khynnah ka dei kaba sah ha ka shnong Lawbyrtun bad kaba pule ha Mawkyllei Higher Secondary School.
Katkum ka jingïathuh jong ki khynnah kiba lap ïa ka, la ong ba ki la lap nyngkong ïa ka sweeter jong ka kaba don ha surok bad katba ki dang pyrshang ban wad ki la ïohi ïa ka jaiñ rumal kaba khah da ka snam bad ha kum kane ka por ki la ïoh sngew ïa ka jingpyrta kaba la pan jingïarap bad ki la ïohi ïa kane ka khynnah kaba la khah lut da ka snam ha ka dur khmat.
La ong ruh ba ka jaka ba kane ka khynnah ka la shah shoh pynmynsaw ka dei ka lawbniap kaba kynjah.
Kane ka samla ka la ïathuh ha kine ki khynnah ba kam ithuh satia ïa kita kiba shoh ïa ka bad ka la ïathuh ruh ba kine ki runar ki la tangon ïa ka da u maw da ka durkhmat bad pynap ruh da ka tari na u ryndang jong ka.
Ki Pulit jong ka Mairang Police Station bad ki Pulit jong ka Crime Scene Unit na ka tnat CID Shillong tang shu ïoh jingtip halor kane ka jingjia ki la hiar sha ka jaka ba la jia ka jingshah shoh jong kane ka khynnah ban pynlong ïa ka jingtohkit kaba bniah.
Ki Pulit ki la register case halor kane ka jingjia bad ka jingthwet ïa ki runar kiba donkti ka dang ïaid shakhmat.
