Shong High Level Meeting u VC bad ki bor pynïaid ba mih ka jingïashoh ha Hostel No-19 ka NEHU
Shillong, Nailur, 19: Ka North-Eastern Hill University (NEHU) ka la shimkhia mardor ïa ka jingïashoh ïadat kaba la jia ha ka Hostel No. 19 ha ka miet Lah Sngi U Blei.
U kyrwoh ba la phah da u Public Relation Officer (PRO) ka NEHU, u Dr. Davidson Pyngrope u la ïathuh ba ka jingïashoh bad ka jingïaktah kti marmet ka la jia hapdeng ki samla pule kiba sah hapoh Hostel, tang na ka daw ba ka la mih ka jingbym ïamynjur ïa ki aiñ bad ki kyndon kiba ïadei bad jingim hapoh Hostel.
“Kane ka jingjia, kam don bynta eiei bad kano kano ka jingïasngewpher jaitbynriew, kumba la saphriang ki khubor hamsaïa ha ka rynsan Social Media,” ong u kyrwoh.
Kane ka jingjia tang shu poi sha ki tyndong skhor jong ki bor pynïaid ka skulbah, la tem mardor bad la pynthikna ruh ba ki samla pule kiba sah hapoh Hotel kin don hapdeng ka jingshong shngaiñ. Marmar, u Dean of Students Welfare, u Warden uba peit ïa ka Hostel 19 bad u Security Officer jong ka skulbah ki la poi sha kane ka jaka ban tem ïa ki jingkajia.
Shuh shuh, la pyntip ruh mardor sha ki bor Pulit kiba la poi ha phyllaw jong ka NEHU ban shim jingkheiñ halor kane ka jingjia bad ban ïarap ruh ban peit ïa ka shongsuk shongsaiñ.
Halor kane ka jingjia, ha ka sngi Baar ka North-Eastern Hill University ka la pynlong ïa ka high-level meeting ban ïathir ïatai sani halor kane ka jingjia. Ha ka jingïalang la ïashim bynta da u Vice- Chancellor, u Registrar, u Dean of Students Welfare, u Proctor, u Security Officer, bad u Warden jong ka Hostel No. 19.
Ka jingthmu jong kane ka jingïalang ka long ban ïathir sani pura halor ka jingjia ha ka miet Lah Sngi u Blei khnang ban pynthikna ban pynshitom ïa kiba donkti katkum ki kyndon treikam jong ka University.
Ki bor pynïaid jong ka NEHU ki la ïathuh ruh ba ïa ka jingïakajia la lah ban tem noh mardor bad pynshai ruh ba kam don jingïadei satia bad ka jingsngew ïapher jaitbynriew, kumba la pynpaw da ki khubor hamsaïa.
Ka University ka buh hakhmat eh ban wanrah ïa ka jingshngaiñ jong ki samla pule bad kano kano ka jingpynkheiñ aiñ yn leh da kaba tyngeh katkum ki kyndon treikam.
Ka NEHU ka kyntu ïa ki kynhun bapherbapher, ïa ki nongtrei, ki samla pule, ïa ki kmie ki kpa bad ïa ki paidbah ba kin shahniah ïa ki khubor kiba la pynmih da ka Skulbah bad ban pynshisha ïa ki jingtip ba la ai da ka Skulbah khnang ban kiar na ki hamsaïa bad ki khubor lamler.