Mawkyrwat, Risaw 11: U bah Pius Marweiñ uba long u nongmihkhmat jong ka Ranikor Constituency ula pyllait paitbah ïa kawei ka kot kaba la ai kyrteng, “Ka Shnong Nongkynbah bad ka Riti Synshar-Khadar”, bad ïa kane ka kot la thoh bad pynbit pynbiang da u Bah G.G. Bung Snaitang uba long ruh u Myntri jong ka shnong Nongkynbah, South West Khasi Hills District.
Haba ai jingkren ha ka jingïalang, u bah Pius Marweiñ, u la ai khublei kyrpang ïa u bah G.G. Bung Snaitang halor ka jingtrei shitom jong u ban thoh, pynbit pynbiang bad pynmih ïa kane ka kot, bad pynpaw ruh ïa ka kyrmen ba kane ka kot kan nang teh skhem shuh shuh ia ka shnong Nongkynbah ba kan ïatylli kawei na ka bynta ban kiew shaphrang ha ki kam baroh.
U bah GG Bung ha ka jingkren jong u, u la ïathuh ba ka jingpynmih jong u ïa kane ka kot ka long kum ka dak jong ka jingkynmaw burom ïa la u jong u kpa, u (L) Bah Kwales Thongni, Myntri barim ka shnong Nongkynbah uba la long Myntri haduh 28 snem kynthih, kata, naduh ka snem 1991-2019. “Ha kane ka kot, la thoh lut ïa ka jingïoh nyngkong ïa ka shnong, ka jingwan ka niam Khristan (Presbyterian), ka jingseng ïa ka skul ba nyngkong da ka Balang Presbyterian, ka jingwan ka surok bad kiwei ki kam pynroi, bad kumjuh ka History jong ki Kur kiba shong shnong ha Nongkynbah,” ong u bah Snaitang.
Ha kane ka kot, la thoh ruh janai ïa ki Riti Synshar Shnong jong ka shnong Nongkynbah, kaba la mynjur ruh da ka Dorbar Shnong Nongkynnah, bad kane kan pynsuk haduh katta katta ïa ki pateng ban wan haba ki ïashimbynta ha ka kam synshar khadar hapoh ka shnong Nongkynbah.
Ïa kane ka jingïalang ha kane ka sngi la pynlong hapoh ka Hall jong ka skul Sharak Rit ha shnong Nongkynbah ha kaba la ïadonlang ruh u bah Cornelius Nongbri, Vice Chairman ka DSC, South West Khasi Hills District, lem bad kiwei kiwei ki riew rangbah.
