Jowai, Risaw, 11: Ïa ka Nartiang Rural Haat/Market Complex kaba don ha ïew Nartiang West Jaiñtia Hills District la plie paidbah ïa ka mynta ka sngi da u Dolloi ka Elaka Nartiang u ma Salong Lamare hapdeng ka jingiphuh iphieng kaba dei ruh ka sngi ïew Nartiang.
La plie ïa kane ka ïew ba thymmai (market complex) da ka jingïarap jong ka National Bank for Agriculture and Rural Development (NABARD) hapoh ka Off Farm Development funding bad la pyntrei da ka Meghalaya State Rural Livelihoods Society (MSRLS).
Ha ka juh ka por la ïarap pisa lang da ka Nartiang Village Organisation (SHG) ba la kyrshan na ka MNREGA (BDO, Thadlakseiñ) kaba kynthuplang ka jingpyntrei ïa ki surok bad ki jaka ïaid kjat.
Ha kane ka sngi la sakhi lang da u bah G. N. Kharlukhi, u Lalrokunga Chhakchhuak Assistant General Manager (s), NABARD, Dr B. Plain, SMM of MSRLS, Secretary ka Seiñ Raij, ki dkhot ka Nartiang Village Organisation SHG, ki nongïalam shnong bad ki nongshong shnong ka thaiñ.
Hadien kane ka jingïalang la aiti ïa katei ka ïew sha ka Community haka jingdonlang ki nongkitkam shnong bad ha ka juh ka por kin peit ïa ka jingdonkam jong kane ka ïew na ka bynta jingbha jingmiat jong ki nongshong bad ki nongleit ïew.
