Pyllait Paidbah u Secretary ka SSA ïa ka YouTube Channel Jong ka PFR Football Academy

Shillong, Nailur 04: U Bah Dipshon Lyngdoh Nongbri – Secretary jong ka Shillong Sports Association, ha ka Lah Sngi U Blei u la pyllait paidbah ïa ka YouTube Channel jong ka PFR Football Academy ha SSA Ground, Polo.
Haba ai jingkren halor kane, na ka liang jong u Secretary kane ka shlem ai jinghikai (Academy) u la pynpaw ba ka jingthmu jong ka Academy ban don noh ïala ka jong Official YouTube Channel ka long halor ka nongrim ban thep ïa ki video haba don ki jingïakhun lane ki League kiba ka Academy ka ïashim bynta naduh ka lympung ïalehkai League jong ki khynnah rit haduh ka League jong ki khynnah heh ba kynthuplang jong ki Shynrang bad Kynthei.
U la bynrap, “Kum ka Academy, Ngi don bun bha ki nongkyrshan kiba kwah ban wan peitkai haba don jingïalehkai jong ka PFR, hynrei teng teng ki don ki bym lait ban wan peit namar ki kam ba ki hap pyndep. Da kaba Ngi pyllait (upload) pat ïa ki jingialehkai jong Ngi hapoh kane ka Channel ki bym lah ban poi ki lah ban ïohi bad khamtam haba ngi don ki Tour shabar ka jylla ki lah ban sakhi ïaka jingialehkai lyngba kane ka Channel”.
Kane ka Channel kan long kum ka jingpynsah jingkynmaw ïaki khynnah rit ba ynda ki la heh la san ki lah ban ïohi biang ïa ki jingialehkai ba ki ïashimbynta haka por kaba ki dang khynnah. Kane ka Channel kan ïarap shibun ïaki nongkyrshan jong kane ka Academy.
Naka liang jong u Secretary ka Shillong Sports Association u Bah DL Nongbri u la ai khublei ïa kane ka Academy kaba la shim ïa kane sienjam bad u la ong ba u sngewsarong haba ki klob kiba ïatreilang (affiliate) bad ka Shillong Sports Association kin wanrah ïa kum kane ka bynta.
Ha kaba ïadei bad kane, na ka liang jong ka Academy ka kyrpad ïaki nongkyrshan jong ka Academy ban kin kyrshan da kaba peit ïa kane ka Channel, khamtam ki jingïalehkai baroh jong ka Academy kaba ïakhun ha ka 2nd Division Football League kiba yn sa pyllait ha kane ka Channel bad kumjuh ba kin like,share bad subscribe.