Shillong, Nailur 04: Ka kynhun ïalehkai phutbol ki thei ka jylla Meghalaya ki la mad biang ïa ka namrem hadien ba shah pynliem da 6-1 kol ha ka Karnataka ha ka jingïalehkai kaba ar na ka Group B ha ka Sub-Junior Girls’ National Football Championship (Tier 1) kaba long ha Malda, West Bengal ha ka Sngi Balang.
Ha ka jingïakhun, ka Meghalaya ka la ïoh ban lamkhmat nyngkong ïa ka jingïalehkai lyngba ka Shirley N Marbaniang tang ha ka 11 minit, hynrei ka long kaba sngewsih pat ba ka kynhun kam shym la lah ban bat skhem ïa ka jingïalehkai naba ka Karnataka ka la lah ban pynïakhaid bad thep ruh haduh 6 kol.
Da kane ka namrem, ka Meghalaya ka sah ha traiduh na ka Group khlem da ïoh kamai point na ki ar sien ïakhun, bad kan ïalehkai khadduh pyrshah ïa ka Gujarat la Sngi Thohdien.
Ki thei ïalehkai ka Meghalaya kiba mih madan ha kane ka jingïakhun ki long: Dawansaphi Snaitang (GK), Banyllashisha Nongkhlaw (sub Ephibat I Malieh 70′), Daficare Lyngkhoi, Nishalin Nongrum, Albela Iangjuh, Jenisha Rani, Deiphiwansara Lyngkhoi (sub Venecle Kharmusulman 70′), Bandabetshisha Nongrum, Saralang Lapang (sub Daphinia Rympei 55′), Mayanylla Syiemlieh (sub Laiahunlang Nongrang 28′), Shirley N Marbaniang.
