Da kaba suk rung sha ka Quarter final ha ka U-17 Subroto Cup 2024
29 kol na ki lai sien ïakhun khyrwit ka Meghalaya
Shillong, Nailur 04: Ka kynhun ïalehkai na Meghalaya ba la mihkhmat da ka Mynken Christian Higher Secondary School na Ri-Bhoi District, ka la ïai bteng ïa ka jingïaid lynti da kaba jop baroh lai sien lynter ki jingïakhun na ka Group-F hadien ba ka la lah ban pynliem noh da 5 kol ïa ka Bihar ha ka Sngi Balang (4 tarik Nailur) ha New Delhi.
Da kane namjop ka Meghalaya ka la pynthikna ïalade ban rung da kaba suk sha ka wat ïakhun Quarter final naba bat kyrdan ba hakhliehduh na ka Group-F.
Ha kane ka jingïakhun la sakhi ïa ar ngut ki rangïalehkai ka Jylla kiba la ïoh ban pynkhihjar mar ar kol, kine ki long u Bannganson (13,45 minit) bad u Mebanlamlynti (32, 35 minit), katba ka shi kol ka la wan na u Pynshai ha ka minit ba 56.
Haba kyllumlang naduh kaba sdang, ka kynhun Meghalaya ka la ïoh ban pynkhih haduh 29 kol na ki lai tylli ki jingïalehkai. Ka jylla ka la jop nyngkong da kaba pynliem kput haduh 23 kol ïa ka Dadra & Nagar Haveli and Daman & Diu, nangta bud sa ka namjop pyrshah ïa ka Chandigarh (lahduh ba bat ïa ka burom) da 1 kol ha ka sngi ba bud.
Katkum ka prokram ba la pynbeit, ka Meghalaya kan hap ban aireng ïa ka lahduh jong ka Group E ha ka quarterfinal la sngi Saitjaiñ. Hynrei ka Group E, ka don san tylli ki kynhun ban pynkut la sngi Thohdieng.