Pyllait paidbah u Myntri Rangbah ïa 3 tylli ki Mobile Medical Unit ban shakri ha ki 93 tylli ki shnong

Shillong, Nailur 15 : U Myntri Rangbah ka Meghalaya, u Conrad K Sangma, ha ka Sngi Ba-ar u la pyllait paidbah ïa lai tylli ki Mobile Medical Unit (MMU) kiba thmu ban rah ïa ki jingshakri ha ka koit ka khiah sha 93 tylli ki shnong ha ki thaiñ Mawpat, Pynursla bad Baghmara.
Kine ki Mobile Medical Unit la kyrshan da ka Altius hapoh ka Corporate Social Responsibility (CSR) bad pyntreikam da ka Apollo Foundation – Total Health. Katkum ka Foundation, kine ki Unit kin shakri ïa palat 2 lak ngut ki nongshong shnong ha kine ki jaka.
Na ki 93 tylli ki shnong kiba la kynthup ha kane ka prokram, 45 tylli ki don ha Mawpat, 26 tylli ha Pynursla bad 22 tylli ha Baghmara.
Ka Mawpat bad Pynursla ki hap hapoh ki Community & Rural Development (C&RD) Block jong ka East Khasi Hills, katba Baghmara ka don ha South Garo Hills.
Lyngba kine ki MMU, ki doktor bad ki nongtrei ka koit ka khiah kiba la hikai pyntbit kin ai jingshakri kum ka jingïasyllok bad ki nongpang, ka jingkhmih ïa ki jingpang, ka jingai dawai, ka jingbuddien ïa ka jingsumar bad ka jingbuh jingtip ïa ki nongpang da kaba pyndonkam ïa ka technology.
Ki nongpang kiba donkam ïa ka jingkhmih bniah shuh shuh lane ïa ka jingsumar kaba kyrpang, yn phah sha ki jaka sumar kiba kham heh.
Ka prokram kan pynleit jingmut kyrpang halor ka jinglap bad jingsumar ïa ki jingpang bym ïabit (Non-Communicable Diseases – NCDs), ryngkat ka jingai jinghikai halor ka koit ka khiah bad ka jinglap kloi ïa ki jingpang.
Yn pynlong ruh ïa ki screening na ka bynta ka jingpang bampong bad kiwei kiwei ki jingpang katkum ka jingdonkam jong ki shnong.
Haba kren ha ka jingïalang, u Conrad u la ong ba ka jingpynkhlaiñ ïa ki lad ai jingsumar kiba lah ban ïoh da baroh ka dei kawei na ki mat treikam ba kongsan jong ka Sorkar naduh u snem 2018.
U la ong ba watla ki jingtei bad ka GDP ki long kiba kongsan, hynrei kine kin ym don jingmut lada ki jingmyntoi kim poi sha baroh ki nongshong shnong. Kumta, ka koit ka khiah bad ka pule puthi ki long ki bynta kiba ka Sorkar ka buh hakhmat.
U Myntri Rangbah u la ban jur ruh ba ka technology ka la shim ïa ka bynta kaba kongsan ha ki jingpyrshang jong ka Sorkar ban weng ïa ki jingeh ha ka koit ka khiah bad ka pule puthi.
U Conrad u la ong ba ka jingjop jong ki Mobile Medical Unit kan shong ym tang ha ka jingpyllait ïa ki kali, hynrei ha ka jinglah ban poi sha ki nongpang bad ban ïada ïa ki jingim briew.
“Ka jingkmen kaba shisha kan wan ynda ngi la lah ban ïada ïa ki jingim, ai dawai ïa ki khunlung, bad shimkhia ïa kiba duk, raitoi bad ki tymmen ki kro,” u la ong.
U la ban jur ruh ba kine ki kali ki dei ban pyndonkam pura bad ka jingshakri ka dei ban pynleit jingmut halor ki nongpang bad ka jingïada ïa ka jingim.
U Conrad u la pynpaw ruh ïa ka jingdonkam ban pynkhlaiñ ïa ki lad pynïasoh digital ban kyrshan ïa ki jingshakri ha ka koit ka khiah lyngba ka technology, haba kdew ruh ïa ki jingpynsngew kiba u la ïoh lyngba ka CM-Connect.