Shillong, Rymphang 04: Ka Voice of the People Party (VPP) ha ka sngi baar ka la pynlait ïa ki mat treikam jong ka ne ka manifesto na ka bynta ka election sha ka Khasi Hills Autonomous District Council (KHADC) bad Jaiñtia Hills Autonomous District Council (JHADC) ka ban long ha ka 21 tarik mynta u bnai.
Kane ka manifesto kaba don kumba 2 sla la pyllait mynta ka sngi ha Mawlai Umjaïur ha kaba la ong ba ka party ka burom ïa ka riti synshar jong ka ri India ban ïakhun pyrshah ïa ka bam sap, ka jingdonkam na ka bynta ka khuid ka suba kaba donkam ïa ki mat treikam ban wanrah ïa ka synshar kaba khuid kaba suba ha kaba ïadei bad ki mat treikam jong ki artylli ki autonomous district councils (ADCs) nalor ban ïada ïa ka bha ka miat jong ki nongshong shnong jong ka jylla.
Ka party ka la banjur ruh ha kaba ïadei bad ka jingpynbha bad ka jingpyntreikam ïa ka Sixth Schedule jong ka riti synshar jong ka ri India, ban pynkhlaiñ ïa ki rukom treikam jong ki dorbar shnong, ban wanrah ïa ki kyndon bad kumjuh ruh ban pynkhlaiñ ïa kiei kiba la don lypa na ka bynta ban ïarap ïa ki nongshong shnong jong ka jylla.
Na ka liang ka seng ka la shim ruh ïa ka jingkular ban wanrah da ki aiñ ki ban ïada ïa ka khyndew ka shyiap bad ban pynthikna ba kan ym don ka jingshah ban beiñ ïa kiba duk bad kumjuh ruh ban wanrah ïa ka job recruitment policy na ka bynta ban thung ïa ki nongtrei hapoh ka district council.
Shuh shuh ka VPP ka la pynthikna ba kan peit halor ka bha ka miat jong ki nongshong shnong kiba im basah ha ki thaiñ khappud bad kumjuh ruh ban tohkit halor ka jingïakajia pud bad ka jylla Assam.
Na ka liang ka seng ka la kular ruh ban wanrah ïa ki ain ban ïada ïa ki um ki wah, ban ïada ïa ki khlaw ki btap bad kumjuh ruh ki law kyntang.
Ha kaba ïadei pat bad ka jingai No-objection certificate ban seng ïa ki karkhana ka VPP ka la pynthikna ba kine ki karkhana ki dei ban long ki jingmyntoi ïa ki paidbah nongshong shnong bad ki ban ïarap ïa ki nongsengkam jong ka jylla.
Na ka liang ka party ka la pynthikna ruh ban shim ïa ki sienjam ban pyntreikam ïa ka e-governance bad pynthikna ruh ban pyrshah ïa ka kam tih uranium.
Haba pynpaw ïa ka jingdonkam ban pynneh pynsah bad kumjuh ruh ban kyntiew ïa ka jingriewspah jong ka riti dustur da kaba buh ïa ka museum, na ka liang ka VPP ka la ong ba kan shim ïa ki sienjam ban kyntiew ïa ki kam jngohkai bad kumjuh ruh ban wanrah ïa ki policy ki ban ïatreilang bad ka district council bad kumjuh ruh ba ki nongïalam shnong, ban kyntiew ïa ka khaïi ka pateng bad kumjuh ruh ban ïada ïa ki nongrep.
Na ka liang ka party ka la pynthikna ban kyntiew ïa ka khajna jong ka jylla bad kumjuh ruh ban kyntiew ïa ka traditional medicine, nalor ka kam ban kyntiew ha ka pule puthi bad ki kam wadbniah bad kiwei kiwei.
