Shillong, Lber 16: Ka Ïing dorbar jong ka jylla Meghalaya ha kane ka dorbar mang tyngka ka la nang pynlait ïa ka pisa T.3,18,96,000/- tyngka na ka bynta ban ïarap ïa kito kiba ri sniang kiba la ïap na ka daw jong ka jingpang ‘African Swine Fever’ ha ki por ba la dep.
Kane ka pisa kaba la pynlait da ka Ïing dorbar Thaw Aiñ ha kane ka dorbar mang tyngka kaba dang shukut, ka long ban ïarap ïa kito ki briew kiba ri sniang kiba la ïap na katei ka jingpang ha u snem 2022-23 haduh 2024-2025.
Kane ka jingïarap pisa ïa kiba ri sniang kan long katkum ki kyndon State Disaster Response Found (SDRF) bad ki kyndon jong ka National Disaster Response Fund (NDRF) na ka bynta jong u snem 2022-2023 bad u snem 2024-2025.
Namar ba kam shym don ka jingmang pisa ha kane ka snem mang tyngka 2024-2025 kumta na ka liang jong ka sorkar ka la hap ban pan ïa kane ka pisa na ka ïing dorbar ban ïoh ïarap ïa kiba ri sniang na ka bynta ban ïarap ïa ki ha kane ka jingeh ba ki mad ha kitei ki snem.
