Shillong, Lber, 30: Ha ka step jong ka sngi Thohdieng ar ngut ki heprit kiba la tip kyrteng kum u Banphiralang Thongni bad u heprit Synsharlang Thongni kiba na ka shnong Kynsohsan, South West Khasi Hills District ki la ïoh ban pyllait im ïa kawei ka sim dkhoh bad ïa kane ka sim la aiti noh sha ki nongtrei jong ha ka tnat Wildlife.
Kine ki arngut ki heprit ki la ïathuh ba ki la lap ïa kane ka sim ha ka por ba ki dang mareh step bad dei ynda ki la poi hajan ka ophis jong ka tnat Forest, Mawkyrwat, ki la lap ïa shi kynhun ki ksew kiba la kthong ban bam doh ïa kane ka sim hynrei ha ka jingkloi noh jong ki ban kem ïa ka sim, kane ka sim ka la lait im hynrei ka la shu mynsaw na ki bynta ka thapniang na ka jingshah kthong ha ki ksew. Katkum ka jingïathuh jong ki nongtrei ka tnad Wildlife, kine ki jait sim Dkhoh Saw ki dei ki sim kiba la sdang ban duhjait bad na ka liang jong ka tnad Wildlife ka la kyrpad ïa ki nongshong shnong ba lada ki lap ïa kum kine ki jait sim kin sngewbha ban pyllait im lane ban aiti noh sha ka tnat wildlife bad kumjuh ïa kiwei de ki mrad.
Ïa kane ka Dkhoh la aiti noh sha ki nongtrei ka tnat Wildlife ha ka 30 tarik, Lber 2024 ryngkat ka jingdon lang jong u Vice President ka Seng Samla Shnong Mawkyrwat u samla Skhembor Nongrum.
