Shillong, Nailar, 20: Ka jingpang saw khmat (conjunctivitis) ne pang Bangla ba ju ïakhot hangne ha Ri-lum Khasi, hadien ba ka la saphriang ha Ri Bhoi District mynta ka la pur sha kylleng ki jaka ha Meghalaya bad tang mynta ka sngi Saitjain, da ki phew ngut ki briew ki la wan phah khmih ïa kane ka jingpang hapoh ka Mawlai Mawroh Community Health Centre (CHC).
ïa kane la pyntip da ka District Medical and Health Officer (DMHO) ka East Khasi Hills, Dr Adriana Lyngdoh.
Ka Dr Lyngdoh ka pyntip ba bun na kine ki nongpang ki dei ki nongïalehkai jong ka Sports Authority of India (SAI) kaba don ha phyllaw ka NEHU. Ka Dr Lyngdoh ka la ban jur ïa ka jingdonkam ban sait bha ïa ki kti kum kawei ka lynti ban ïada ïa ka jingsaphriang ka jingpang.
Na ka liang ka Sorkar Jylla ka la pynmih ïa ka jingbthah halor ka jingïada ïa kane ka jingpang.
