Shillong, Nohprah, 19: Arngut ki Pulit Home Guard kiba don ha ka kamram ap pahara ka Secretariat ha ka sngi Palei ki la ïoh bat ïa uwei u khynnah uba dang hapoh 18 snem ka rta katba u dang pyrshang ban tuh ïa u Generator na ka phyllaw kaba don ha lyndet jong ka 3rd Secretariat.
Ki nongap pahara ba kynthup ïa u Lingbirth Arengh bad u Darmiki Langstang ki la ïohi ïa une u nongtuh katba ki ïaid lynti najan ka 3rd Secretariat bad na ki rukom leh jong u ka la pynsuba sniew ïa ki bad mar mar ki la bat noh ïa u.
Hadien kane, ki la pyntip noh sha ki bor bahalor bad ïa u nongtuh la aiti noh sha ki Pulit jong ka Sadar Police Station ban leh ïa kaba donkam katkum ki kyndon jong ka aiñ, la ïathuh u kyrwoh ba la phah da u Senior Staff Officer & Addl. PRO ka Directorate of Civil Defence & Home Guards, Meghalaya u Bah PH Shylla.
