Khliehriat, Nohprah, 19: Ban pynshlur ïa ki khynnah ba kin nud ban mih shakhmat ban pyni ïala ki sap ki phong ka AVENUES ka la pynïaid ïa ka Winter Camp halor ka phang pdeng ba la buh ha ka tien Pnar “ïa ka Mynried’ kaba mut na ka bynta ka lawei.
Ka Winter Camp ba la kyrshan da ka Deputy Commissioner ka East Jaintia Hills District lyngba ka jingkyrshan pisa na ka District Mineral Funding (DMF) ka la sdang naduh ka 11 tarik mynta u bnai ha Khliehriat Higher Secondary School bad la pynkut noh ha ka sngi Baar.
Ha ka jingpynkut ïa ka Winter Camp, ka MLA jong ka Sutnga Saipung Constituency ka kong Santa Mary Shylla ka la long kum ka kongsan bad u Deputy Commissioner ka East Jaiñtia Hills District u Shivansh Awasthi ua long kum u symbud kongsan bad ki la don haduh 300 ngut ki khynnah skul kiba la ïashim bynta ha ka Winter Camp.
Hapoh ka jingïalam jong ka AVENUES ki khynnah ki la ïoh mynsiem bad mih shakhmat ban pyni halor rynsan ïa la ki sap ki phong ba ki don.
Kane ka winter camp ka dei kawei na ki kam baradbah jong ki bor synshar ka East Jaiñtia Hills District kaba don ka jingthmu ban pynkhlaiñ ïa ka bor jingmut jingpyrkhat jong ki khynnah kiba don ha ki jaka ba shah ktah na kaba tih ïa ki marpohkhyndew ba la ker sawdong ruh da ki jait jingdih kiba sniew kum u drok. Ka kynhun jong ka AVENUES hapoh ki hynriew sngi ba pynlong ïa ka winter camp ka la ai ki jingïasyllok ba marmet bad pynkhlaiñ, pynskhem ïa ka jingmut jingpyrkhat jong ki khynnah bad ruh kane ka Winter Camp ka dei ruh kata ka rynsan kaba biang bha ïa ki khynnah ba kin ïoh ka lad ban kyntiew shuh shuh ïa ki sap ki phong ba kyrpang ba ki don ban pynpaw pyrthei.
Ka Kong Santa Mary Shylla haba kren kum ka Kongsan ka la ong ba ka District Mineral Fund ka dei kawei na ki shlem ba ju kyrshan radbah ïa ka East Jaiñtia Hills District hajan baroh ki liang khamtam eh ha kaba kyntiew ïa ka jingnang jingstad bad ki lad ai jingsumar.
Haba kren pat shaphang ka Winter Camp, ka kongsan ka la ong ba kane ka dei ka prokram kaba donkam bha bad kaba kum kane ka prokram ka ïarap ruh ha kaba kyntiew ïa ka jingnang jingstad bad ïa ka koit ka khiah bad ka ïarap shibun ïa ki khynnah namar kum kine ki prokram ki ai mynsiem bad pynshlur ïa ki khynnah ba kin nud ban ïeng ban kren paidbah halor rynsan khlem kano kano ka jingsngew sheptieng, ki khynnah kin nud bad shlan ruh ban mih shakhmat ban kren ïa ki jingshisha bad ruh ban pyni shynna ïa ki sap ki phong ba ki don.
Kane ka prokram ka long ruh kum ka jingai jingpynshai bad pynsngewthuh ïa ki khynnah ha kaba ïadei bad ka jingshyrkhei u drok uba buh jingma ïa ka koit ka khiah bad ïa ka imlang ka sahlang.
“Nga kyntu ïa phi ki khynnah ba phin rah ïa kane ka khubor sha ki ïing ki sem bad sha ka imlang ka sahlang ban ïathuh shaphang ka jingshyrkhei jong u drok bad ruh ban ai mynsiem ïa kiwei ruh ba kin mih shakhmat ban pyni ïa ki sap ki phong ba ki don,” ong ka Kong Shylla da kaba bynrap ruh da kaba ong ba ïa kaba kum kane ka prokram dei ban pynlong sa ha kiwei kiwei ki skul ruh kiba don hapoh ka district.
U Shivansh Awasthi haba ai jingkren kum u Symbud Kongsan u la kren shaphang ka jingshyrkhei u drok bad ong, “ka jingdih drok ka dei kawei kaba shyrkhei haduh katta katta bad kam pat biang satia ban shu ong ba ngim treh ban dih ïa u drok ne ban ong Em ïa u drok hynrei dei ban don kata ka jingïatreilang kum ka kynhun ban ïakhun pyrshah ïa u drok. Kane ka prokram kaba don ïa ka phang pdeng ‘ka Mynried” ka dei na ka bynta jong phi ki khynnah namar phi dang don bun ka lawei shakhmat na ka bynta ka ri bad na ka bynta ka pyrthei hi baroh kawei”
U Awasthi, u la ong ba kane ka prokram ka dei kaba donkam bha na ka bynta ki khynnah bad u la ai ka jingkitbok ïa ki khynnah kiba la mih shakhmat kiba la pyni halor rynsan ïa la ki sap ki phong bapher bapher bad ong “bun na phi pphi la shu buhrieh ïa la ki sap ki phong bad ngi da kwah eh ba phin mih shakhmat da ka jingsngew skhem khlem jingsngew sheptieng ban pynpaw sha ka pyrthei ïa ki sap ba kyrpang da kaba sdang shwa napoh ka district bad kane mynta ka dei ka jingsdang bad nangnne shakhmat ngin sa nang pynlong shuh shuh sa kiwei kiwei ki prokram kiba long ka rynsan na ka bynta jong phi ki khynnah kiba don ki sap ki phong”
Kiba la ai jingkren ki kynthup ruh ïa u Founder-CEO jong ka AVENUES u Bah Mark Laitflang, u Principal jong ka Khliehriat Higher Secondary School u Brother Solomon Swer, u Project Leader jong ka Winter Camp ha East Jaiñtia Hills District u Bah Alphonsius Khongwirnong, ki dkhot jong ka AVENUES, ki nonghikai jong ka Khliehriat Higher Secondary School lem bad ki khynnah skul.
Ka Xevia Samantha Sympli, ka heprit kaba pdang pule ha ka Class-7, ka la batai halor ka jingshem jong ka ha kane ka jingpynlong ïa ka Winter Camp bad ong “lyngba kane ka Camp, nga la tip mynta kumno ban pyndonkam ïa ki saw tylli ki ‘S’ (Smile, Stand, See, and Speak) bad nga sngewtynnad haduh katta katta ïa kane ka Winter Camp bad nga tip ruh ïa kiei kiei kiba dei bad ka jingim jong nga ha kano ka kam ba nga ju sngewtynnad, ka sap ba nga don, ka jingsngewtynnad jong nga, ka jingtrei ba nga nang bad ka dor ba nga don.
Haba kren pat shaphang u drok, ka Xevia Samantha Sympli ka la ong “u drok u dei uba shyrkhei haduh katta katta bad ba buh jingma ïa ka koit ka khiah, uba ktah ha ka jingïadei bad kiwei pat, uba ktah ruh ïa ka imlang ka sah lang, kane ka Camp “Ïa ka Mynried” ka dei ka ban ïarap shibun ban tei ïa ka lawei”
U AlrikShylla, u heprit uba dang pule ha ka Class 9, u ïathuh ba kumno la kha bad la pynheh pynsan ïa u ha shnong Khliehriat.
Ki la don bun ki khynnah, kiba da ka jingsngew skhem ki la mih shakhmat bad pyni halor rynsan ïa ki sap ba ki don kum ka sap ban rwai, ban shad, ban kren paidbah, ban suh jaiñ kum ki Fashion Designer bad kiwei kiwei.
Ha ka jingdon ryngkat lang ki dkhot jong ka AVENUES, ka kongsan bad u Symbud kongsan ki la aiti ïa ki syrnot jong ki khynnah skul ha u Brother Solomon Swer.
