Nongstoiñ, Ïaïong 27: Ka Balang u Blei (COG) Meghalaya & Assam, na ka bynta ban nang pynkhlaiñ shuh shuh ïa ka jingshakri Blei, ki Pastor bad ki rangbah jong ka Balang ha shuwa jong u snem 2000, ki la ïakynduh lang bad da kawei ka jingmut ki la ïakut ba ki hynñiew tylli ki district kata ka district Nongstoiñ, Mawten, Mawphanïew, Ri lyngam, Rambrai, Marïem bad Mawthadraishan, kin don noh ka jingïaseng kaba kyrpang ha kaba ki dkhot jong ki circle bad ki Balang kiba don hapoh jong kitei ki hynñiew tylli ki District kin ïakynduh lang.
Kumta naduh u snem 2000 ka Balang u Blei M&A ka la sdang ïa ka jingïakyduh lang kaba nyngkong ban pynlong ïa ka jingïaseng. Kumta naduh ba ka Joint District ka la sdang ka la ïoh ban pynlong ïa ka Joint District haduh hynriew sien bad ïa ka Joint District kaba hynriew la pynlong ha ka Balang u Blei Mawïonglumsyntiew ha New Nongstoiñ kaba la sdang naduh ka sngi thohdieng ka 25 tarik bad kan kut ha ka 27 tarik Ïaïong.
Ka Joint District kaba la pynlong ha ka Balang u Blei Mawïonglumsyntiew ka long ruh ka jingïaseng ka ban sah jingkynmaw ha ka history jong ka Balang u Blei M&A, namar ba katei ka Joint District kaba hynriew ka dei ruh ka jingrakhe ïa ka Jubilli Rupa jong ka jingdap arphewsan snem naduh ba la sdang ïa ka Joint District.
Nalor kata kum ka dak ban pynsah jingkynmaw ïa ka jingdap arphewsan snem, ka Joint District ka la tei ruh ïa u mot sah jingkynmaw ha phyllaw jong ka Ïingmane jong ka Balang u Blei Mawïonglumsyntiew, ha kaba la plie ïa utei u mot da u Rev H.D.Hoojon.
Ha shuwa ban plie ïa utei u mot sah jingkynmaw la pynlong ïa ka jingïalang ba lyngkot ha kaba la pynïaid da u Rev Dr S.A Ïawphniaw bad la pule na ka Ktien ka jong u Blei bad duwai da u Bah P.Myrthong Evangelist. Hadien ba la dep ban plie ïa utei u mot la rung hapoh Ïingmane bad la pynrhem ïa katei ka jingïaseng da ka kynhun rwai Choir na ka Balang u Blei Mawten. La ïoh ïa ka report lyngkot na u Mr H.R.Lyngkhoi secretary jong ka Joint District. La pyllait ruh ïa ka Souvenir jong ka jingdap arpshewsan snem jong ka Joint District da u Rev R.Imïong.
La ïoh ban rwai ïa ka Theme song jong ka Joint District da ka kynhun rwai jong ka Worship Team na ka balang Mawten. Ha ka jingïaseng miet la ïoh ban plie ïa ka Theme da u Rev R.S.Thabah. Nangta ha ka jingïaseng mynstep sngi saitjaiñ pat ka don ka jingkren ïa ka Subject kaba ong, “Ka jingkitkhlieh u Khristan ha ka imlang sahlang”, ba la kren da u Bah W.L.Snaitang.
Ha ka sngi u Blei pat ha ka jingïaseng kaba nyngkong por 10 baje u nongkren u dei u Rev Dr S.Kharsyiemlieh, katba ha ka jingïaseng ba ar ha ka por 1 baje pat u nongkren u dei u Rev R.Imïong bad ha ka jingïaseng miet por 6.30 janmiet pat u nongkren u dei u Rev E.Lyngdoh.
