Plie u Myntri Rangbah ïa ka First Referral Unit ha Ranikor Community Health Center

0

Shillong, K’lyngkot, 25: U Myntri Rangbah ka Jylla u Conrad K Sangma ha ka sngi Thohdieng u la plie paidbah ïa ka First Referral Unit (FRU) ha Ranikor Community Health Center (CHC), South West Khasi Hills District.
Ha kane ka FRU ba dang plie thymmai yn ai jingsumar kyrkieh ïa ki longkmie ba armet, ka jingpuid ïa ki nongpang, ka jingsumar ïa kiba donkam kyrkieh ïa ki longkmie bad ki khunlung bad ïa ki nongpang.
Ka Sorkar ka la shim rai ban kyntiew kyrdan ïa ka CHC sha ka FRU ban pun jingkieng ïa ka jingshakri ha ka koit ka khiah bad ban pynduna ïa ka jingkit kaba khiah hapoh ka district bad ki hospital ba don hapoh ka district.
Ka Ranikor FRU kan dei kawei napdeng ki san tylli ki jaka ai jingsumar ba la plie ha ka wat ha nyngkong eh, ryngkat bad ka Mawphlang, Bhoirymbong, Pynursla bad Resubelpara.
Na ka bynta ka wat kaba ar, kin don sa hynriew tylli ki CHC ba kynthup ïa ka Namdong, Riangdo, Patharkhmah, Selsella, Phulbari bad Dalu.
Ha ka jingleit iuhkjat jong u Myntri Rangbah sha Ranikor, u la ïohlad ban ïakren bad ki nongshong shnong jong ki shnong bapher bapher bad ban sngap ruh ïa ki jingeh ba ki la pynsngew.
Lyngba ki jingïakren, ki paidbah ki la pynpaw ïa kiba bun ki mat ba dei ban leh eiei noh ha kaba la sakhi lang da ki ophisar bad ki khlieh jong ki tnat treikam bapher bapher.
Lyngba ka CM Connect programme kaba la long ha Ranikor ka la dei ka sien bahynriew ba u Myntri Rangbah un sngap markhmat ïa ki jingeh jong ki paidbah kumba la pynlong ha Nongstoiñ ha u Nohprah, 2024.

Leave A Reply

Your email address will not be published.