Shillong, Jymmang 20 : U Bah Process T Sawkmie, MLA barim u la plie pyrda ïa ka jingïakob ïalehkai carrom board ba la tip kum ka 18th Lawei ka Ri Open Carrom Championship, 2025 ba la pynïaid da ka Lawei ka Ri Sports Socïal & Cultural Club ha Indoor Sports Hall jong ka Mawlai Mawdatbaki ha ka 20 tarik u Jymmang, 2025 ka sngi Hatmajai.
Ha kane ka lympung ïalehkai carrom ki nongïalehkai na kylleng ki bynta jong ka District ki la poi shim bynta kum na Umlyngka, Lawmei, Umsning, Madanryngting, Nongkrem bad kiwei kiwei.
Katkum u bah Sawkmie u la ïathuh ba ha ki por ba la leit ki sports ha Mawlai kum ki basketball, ki badminton, nalor ka carrom bad phutbol ki shongshit bha.
Haba kren ha kane ka sngi u Bah Process u la ong ba u khmih lynti ha ki por ban sa wan ka shngshit biang kumba shongshit ha kito ki por barim bajah.
U pynpaw ruh ba ka carrom ka dei ka jingïalehkai da ka jabieng, ha kaba u la ïaroh ïa ka Lawei ka Ri ba kham ñïar ban don kum kane ka club kabym pat sangeh haba pynlong ïa ka tournament, kaba ki la ïai bteng na uwei u snem sha uwei pat, watla ki mad bun ki jingeh.
U MLA u la ong ruh ba dei da ka jingpynlong ia kum kine ki lympung ialehkai kaba pynlong ia kito kiba don sap ha katei ka jait jingialehkai ba kin lah ban pyntbit shuh shuh ia ka sap kaba ki don.
Ha kajuh ka por u la pynbna ba la plie ïa kane ka jingïakob ïalehkai kaba san sngi kaban kut ha 24 tarik u Jymmang, 2025.
Katba na ka liang u Bah A. Khyriem, Secretary bad bah G. Lymba ka Lawei ka Ri ki la ai khublei ïa bah PT Sawkmie uba ïai don ryngkat bad ka club naduh u snem 2002 bad uba ju ïai bteng ban kyrshan na kawei ka por sha kawei pat.
Ha kane ka sngi la ïoh ruh ïa ka jingkren na Bah F. Nongkynrih, secretary ka Meghalaya Carrom Association bad na u Bah D. Khongwir, Chairman ka Indoor Sports Hall nalor kiwei kiwei.
