Shillong, Jymmang 19 : Ka jingther jong u lapbah ba jur kam shym la khanglad ïa u Myntri Rangbah Conrad K Sangma bad u Symbud Myntri Rangbah Bah Prestone Tynsong kumjuh u Myntri ka tnad Tourism, Bah Paul Lyngdoh ban pyndep ïa ka jingjurip ïa jan baroh kawei ka Ïewduh ha kane ka sngi Nyngkong.
Ryngkat ka jingsynran lang ki heh sorkar na ki tnad bapher bapher jong ka sorkar jylla kumjuh ka DC jong ka East Khasi Hills nalor u Syiem bad Myntri ka Hima Mylliem, u Myntri Rangbah u la hiar ruh shaduh Them Ïewmawlong ban jurip ïa ki nala ba sahkut ka um haba ther u lapbah bad ruh ïa ki lynti ïaid kjat nalor kiwei kiwei.
Nalorkata, u Myntri Rangbah u la leit ruh ban peit ïa ka Ïewdielang kaba ju die ïa u sohsaw bad kiwei ki mar rep ha kaba u la ioh ruh ban tip markhmat ïa ka jingeh ba ki paidbah ki kynduh na ka daw ka jingbym don ka bording.
Hadien ka jingjurip naduh ka basa dohkha, basa ba die ia ki phan saw, phankaro, tit bad basa jhur nangta ïa ka pdeng ïew, ka jaka die ïa ki tiar thaiñ, u Myntri u la pynlut por ruh ban ioh sngew markhmat ïa kaei kaba ki nongshong ïew ki kynduh jingeh.
Haba poi ha ka jaka ba die ia ki tiar thaiñ ki nongshong dukan ki la ai sngewbha ruh da ki tiar thain kum ka dak ka jingai sah kynmaw ia u Myntri Rangbah bad Symbud Myntri Rangbah ha ka jingwan jurip jong ki.
Kumta haba kren bad ki lad pathai u la pyntip ba ka jingwan jong u bad ka kynhun sha Ïew ka long ban iohsngew markhmat ïa ka jingeh ba ki kynduh khnang ba na ka liang ka sorkar kan ioh banleh ïa kaba donkam.
U la ong ruh ba u sngewkmen ba u ioh ban wan jurip ha ka sngi ba jur u lapbah namar ki lah ban iohi markhmat ïa ka jingïaid ka um ha ka nala bad haei ki jaka kiba la donkam ban leh mardor khnang ban pynsuk pynsain ïa ki paidbah nongwan bad nongshong ïew.
“Ngi la sngewthuh ba dang don shibun kiei kiei kiba dang dei ban leh bad kumta, mynta ngin sa pynkhreh ïa ka master plan ban peit kumno ngin lah ban wanrah ïa ka jingpynkylla dur ïa baroh kawei ka Ïewduh,” la ong u Myntri Rangbah. Nangta u ong ruh ba kum ka sorkar ka sngewkhia ïa kane ka jaka namar kadei ka pliang ja jong palat shilak ngut ki nongshong shnong kiba im ja na kaba wan die wan thied bad kaba shong die jingdie ha kane ka ïew kaba heh tam ha ka jylla.
Kyllum lang u ong ba ka sorkar jylla ha ka kylla kaba ar kan pynrung sa 15 klur na ka bynta ban pynbha shuh shuh ïa ki lynti ïaid kjat, ka jingpynïaid bha ïa ki pipe, ki nala ban ïaid ka um ha ka por slap bad bun kiwei kiwei. U Myntri Rangbah u ong ruh ba lyngba kane ka master plan kin sa lah ruh ban pynitynnad shuh shuh ïa ka Ïewduh kaba dei ka ïew kaba la rim bad bna nam naduh ki longshwa manshwa.
Katba na ka liang u Symbud Myntri Rangbah u la ïathuh ba nalor ka 6 klur ba ka sorkar ka la dep ban ai ban siang bha ïa ki lynti ïaid kjat, ka sorkar mynta kan sa mang sa 15 klur na ka bynta kiba bun ki jingdonkam kiban pynkylla dur syndon ïa ka ïew baroh kawei.
U ong ruh ba ka thong jong ka sorkar mynta ka long ban peit ba ki pipe um kiba ïaid na pdeng ïew kin ym pynwit shuh ïa ki lynti ïaid kjat lane ïa ka lynti ïaid jong ka um. Kumta u ong ruh ba lyngba kane ka projek kin pyrshang ban pynkylla dur lut ïa ka ïew khamtam haba ïadei bad ki nala um bad ruh ban pynheh ïa ki lynti ïaid kjat.
