Nongstoiñ, Naiwieng 6: Ka Siejlieh Sport Social & Cultural Youth Organisation, ha ka sngi saitjaiñ jong ka taiew, ka la ïoh ban rakhe lehkmen ïa ka Jubili Rupa jong ka jingkynjoh sha u Mawmer 25 snem jong ka kynhun, ha kaba u Ma Vincent H.Pala MP ka Lok Sabha ka Shillong Seat u la wan ban pynher ïa ka lama jong ka jingsdang ïa katei ka sngi kyrpang kum u kongsan.
Ha katei ka sngi la don ryngkat bad synranlang da u bah Gabriel Wahlang MDC ka Nongstoiñ, bah Bormanding Nonglang President ka West Khasi Hills District Congress Committee, u Samla Deborland Kharsyntiew Secretary ka shnong Siejlieh, u samla Bendrowell Hashah Secretary ka Siejlieh Sport Social & Cultural Youth Organisation bad kiwei kiwei ki riew rangbah jong ka thaiñ kaba kynthup ruh ïa ki nongtrei jong ka seng Congress.
Ha katei ka sngi u kongsan u la ïoh ban pynher ïa ka lama jong ka kynhun bad ha kajuh ka por u la kynjat ruh ïa ka bol kaba long kum ka dak jong ka jingplie ïa katei ka sngi. La ong ba ka shnong kan rakhe ïa katei ka jubili rupa haduh shi snem lynter lyngba ki jingïalehkai bapher bapher bad la ïoh ban sdang ruh ha katei ka sngi da ka jingïalehkai Kynjatbor bad ka Mawpoiñ na ka bynta jong ki kynthei.
U Ma Vincent Pala haba ai jingkren ha katei ka sngi, u la pynbna ruh ba un ai haduh 5 lak tyngka ïa ka kynhun ba kan pyndonkam na ka bynta katei ka madan shnong. U la bthah ruh ïa u President ka kynhun ba un pynbiang noh kham kloi ïa ki kot ki sla khnang ba un ïoh ban pyllait noh ïa ka pisa.
U la ong, “Ka jingkynjoh sha u Mawmer jong ka 25 snem ka pyni ba phi don ka jingïatylli, lym kumta 25 tylli ki snem ka long kaba eh hapdeng ki jingeh kiba bun. Kumta nga ai jingïaroh ïa ki nongsynshar ba ki don shisha ïa ka mynsiem ban kitkhlieh, lym kumta ki samla ha kum kane ka juk kaba mynta ki sakma ha ki jingïalam bakla bad ki ngop ha u drug u ba long u jingdih pynbuaid ban pynjot ïa ka jingim ki samla”.
“Ka long ka nuksa ïa kiwei ba ki rangbah shnong Siejlieh ki pynïatylli ïa ki samla lymba ki jingïalehkai bad to ai ba ka sap kaba phi don kam dei ban kut tang hangne, hynrei ngeit ba na kane ka shnong kin mih ki khlur ïalehkai kiban wanrah ka nam ka burom ïa ka shnong ïa ka jylla bad ïa ka ri hi baroh kawei ha ki por ki ban sa wan”, u la ong.
Kum shibynta ban pynshit pynshngaiñ shuh shuh ïa katei ka jingïalang la ïoh ruh ïa ki jingshad bad ki jingrwai na ki khun shnong. Ïa katei ka sngi lehkmen la pynlong ha madan shnong Siejlieh Nongstoiñ West Khasi Hills District bad la wan ban ïa sakhilang ïa katei ka sngi lehkmen da ki khynnah skul, ki paid nongshong shnong.
