Mawkyrwat, ‘Naiwieng 28: U Ma Lahkmen Rymbui uba dei u MLA jong ka Amlarem Constituency bad kum u Chief Adviser jong ka Sorkar Meghalaya mynta ka sngi ka 27 tarik u Naiwieng, 2013 kum u kongsan u la ïoh ban plie pyrda ïa ka Indoor Stadium kaba don ha Shnong Nonghyllam, South West Khasi Hills District.
Ïa kane ka Indoor Stadium la pyntrei da ka Additional Scheme SCA (BADP) 2019 – 2020 kaba dei na ka Border Area Development Department jong ka Sorkar Meghalaya ha ka jingmang pisa kaba T. 60 lak tyngka.
Haba kren ha ka jingïalang, u Ma Lahkmen Rymbui u la pynpaw ka jingaikhublei kaba kyrpang eh na ka u bah Pius Marweiñ u MLA/MDC Ranikor Constituency ha kaba da ka jingtrei shitom jong u u la lah ban wanrah shibun bah ki kam pynroi hapoh jong ka Ranikor Constituency bad ym tang ha ki shnong kum ka Nonghyllam hynrei ha kiwei de ki shnong kiba ma u peit. Ha kaba ïa dei bad kane ka Indoor Stadium, u Ma Lehkmen u la pynpaw ba ka sorkar hi ka mang tang T. 60 lak hynrei kaba duna ne ka jingpyntrei ïa kaba sah ka long na ka jinglah jong u MLA bad u nongpyntrei ha kaba haba peit ïa kane ka jingpyntrei ne ka Indoor Stadium kam duna shuh ïa ka T. 1 klur ei ei.
Kumta, u la ai mynsiem na ka bynta ki paidbah jong ka dong ka thaiñ Nonghyllam ba da ka jingdon jong kane ka Indoor kan ai jingmyntoi ym tang ïa ki prokram jong ka sorkar, hynrei kam tam eh na ka bynta ki longïing ki ban pyndonkam ha ka ban khreh jingkhwai (ïathoh) ne kiwei de ki jingdonkam. Ha kawei pat ka liang la ong ruh ba ki khun samla lyngba ka jingdon jong kane kin sa ïoh ruh ka lad ban pyndonkam ha ki jingïalehkai bapher bapher khamtam eh ka Badminton ba khnang ba ki samla kiba don sap kin ïoh ban pynlong ruh kum ka jaka kilanmet.
Haba pynkut ïa ka jingkren, u Ma Lehkmen u la kyntu ïa ki paidbah ba ki dei ban don ka jingïatreilang bad u MLA, ki bor sorkar bad kiwei de ki tnad treikam jong ka sorkar kaba dei ha ki liang baroh khnang ba ki kam bad ki jingthmu ban kyntiew ïa ka dong ka thaiñ ki urlong.
Kiwei de kiba la ai jingkren ki long u bah Pius Marweiñ u MLA/MDC Ranikor Constituency kum u symbud kongsan, u bah T. Lyngwa, IAS, Deputy Commissioner jong ka South West Khasi Hills District bad u bah Avin Wanbah, Border Area Development Officer jong ka Ranikor C&RD Block.
Kiba la ïadonlang ki long u bah G.D. Kharwanlang, Superintendent jong ki Pulit ka South West Khasi Hills District, u bah L. Kynjing, Sub Divisional Officer jong ka Ranikor Civil Sub Division, bad kiwei de.
Ïa kane ka program la pynshit pynshngaiñ ruh da ka jingrwai kyrpang bad ka jingshad na ki khun samla jong ka Shnong Nong hyllam. Ha kajuh hi ka sngi ka la don ruh ka jingpyn-i nam ïa ki jait jhur, ki soh, ki um soh bad kiwei de ba la pynïaid da ka ophis District Horticulture Office, South West Khasi Hills District lyngba ka jingbei pisa da ka Agriculture and Procesed Food Products Export Development Authority, New Delhi.
Ïa ka jingïalang la pynïaid da u bah John Paul Hahshah, Sordar Shnong Nonghyllam bad ka jingkren khublei na u Christopher Hahshah.
