Shillong, Naitung 29 : U Lamphang ka Ïing Dorbar Thawaiñ ka Lok Sabha, u Om Biral hynne ka sngi u la plie ïa ka lympung kynduh lang ba la tip kum ka 20th Annual Conference jong ka Commonwealth Parlïamentary Association (CPA), India Region, Zone III kaba ar sngi ha nongbah Shillong.
Haba kren ha katei ka jingïalang, u Lamphang u la kren shaphang ki jingnoh synniang jong u Lamphang barim ka LokSabha bad u Myntri Rangbah ka jylla Meghalaya ba mynshuwa, u PA Sangma. “Ki jingnoh synniang u PA Sangma (bam kwai ha dwar u Blei) ban ai ïa ka lynti ba thymmai ha ki rukom treikam ka Parliament bad ka synshar paidbah ki dei ki ban neh shirta.”
U Birla u la ong ba ka CPA, Zone III, Northeast ka dei ka rynsan na ka bynta ki kynrem ki lyndan ban ïakren shaphang ki jingeh ha ka thain bad ban wad ia ki jingpynbeit ïa kine. Ha kine ki ar sngi, kine ki bynta jong kane ka jingialang kin ïakren shaphang ki lad pyniasoh ha ka thain, ki jingjia lyngshop ki bor ka mariang bad ki lad ban pynbeit ïa kine.
“Ngi la iohi ia ka jingkylla ka suinbneng ha kylleng ka pyrthei bad khnang ban pynbeit ïa ki jingeh kiba mih na ka jingkylla ka suinbneng, kin don ki jingiakren ban pynbeit ïa kine ki jingeh, kiba mih na ki kam jong ki briew, bad ka marïang,” u la ong da kaba bynrap ba ka jingpynbeit ïa ki jingeh kiba mih na ki jingjïalynshop ka marïang, ki rukom ban kyntiew ïa ki lad pynïasoh ha ka thain shatei lammihngi, ka ioh ka kot bad ka jingwanrah ïa ka jingryntih bad ka mariang da kaba pynthikna ïa ka roi ka par ki dei ki kam kiba donkam bha.
U Birla u la ong ruh ba ka rukom im ha India ka dei kaba ïajan bad ka mariang bad kumta, ka roi ka par kam dei ban ktah ïa ka mariang.
Ha ka jingkren halor ka phang, ki lad pynïasoh ha ka thain ban pynïaryngkat ïa ka thain shateil ammihngi bad kiwei kiwei ki bynta ka India, u Birla u la ong ba ka thain shatei lammihngi ka don ïa ki lad ha ka ioh ka kot ban ia ryngkat bad kiwei kiwei ki bynta ka India. Na ka bynta kane, ka jingkyntiew ïa ki jingdon jingem ka long kaba donkam. Ha kaba ïadei bad kane, u la kren shaphang katto katne tylli ki projek kum ka PM Gati Shakti, ka jingpynïar ïa ki surok bah ha ka thain shateilammihngi, ka jingkyntiew ïa ka jingdon ki kad liengsuin ba treikam hapoh ka skhim UDAN bad ki jingkiew shaphrang ha ki kam telecom, ki lad ka leit ka wan lyngba ki jaka shongum, ki khlaw kyntang, ki industrial park bad kiwei kiwei.
U Birla u la ong ba ka Zone-III jong ka CPA India Region ka dei kaba treikam bha hapdeng ki saw tylli ki zone. Ki 20 tylli ki convention ba man u snem ba la long haduh mynta ki pyni ïa ka jingieng skhem ha ki jingngeit jong ka synsharpaidbah hapoh ka ïing dorbar thawain, la ong u Birla. U la kren shaphang ka jinglong kyrpang jong ki ïing Dorbar Thawain jong ka thain shatei lammihngi ha kaba u la ong ba ki don ki jingïakren ba shongkor ha kine ki ïing dorbar thaw ain khlem da don kinokino ki jingpynthut. Kumta, ki mih ki jingpynbeit kiba skhem na kine ki jingïakren kiba wanrah jingmyntoi ïa ka thain bad ka ri bad kane ka dei ka nuksa ïa kiwei kiwei ki zone.
Ha ka jingïakren bad ki lad pathai khubor ha nongbahShillong shaphang ki jinglong jingman ha Manipur, u Om Birla u la kyrpad ban don ka shongsukshongsain. “Ka shongsuk shongsain ka dei ka lynti sha ka roi ka par. Nga kyrpad ba kan don ka shongsuk shongsain ha ka thain shateilammihngi,” u la ong.
Ka jingïalang kaba 20 jong ka CPA, India Region, Zone III ka dang long mynta ha ka ïing dorbar thawain jong ka Meghalaya ha Rilbong, Shillong. U Myntri Rangbah ka Meghalaya, u Conrad K. Sangma, u Deputy Chairman ka Rajya Sabhau Harivansh Narayan Singh, u Lamphang ka ïing dorbar thaw ain jong ka Meghalaya, u Thomas A. Sangma, u Lamphang ka ïing dorbar thaw ain jong ka Arunachal Pradesh bad u Chairman ka CPA India Region, Zone III, uPasang D. Sonaki la ïadon lang ha kane ka sngi.
Ha kane ka jingialang ba ar sngi kin don ki jingïakren shaphang ki artylli ki phang kiba kongsan – Ki jingjialynshop ka mariang bad ki rukom treikam da kaba peit bniah ïa ka thain shateilammihngi bad ki lad jingiasoh ban kyntiew ïa ka thain shateilammihngi ban iaryngkat bad kiwei kiwei ki bynta jong ka ri.
Ha ka prokram pynkut ka ban long ha ka 30 tarik u Naitung yn ai jingkren da u Lat ka jylla Meghalaya, u PhaguChauhan bad kan don ruh ka prokram ban pyni ïa ka deiriti ha ka por janmiet.
