Bteng ka OCF ban ai jingïarap ïa ki khunswet bad ba duna dkhotmet ha Biar bad Pyntei

Jowai, Naitung 26: Ka Orphan Children Foundation mynta ka sngi 28 tarik ka la bteng biang ban ai jingïarap da ki marbam sha ki khunswet bad ïa kiba duna dkhot met sa ha ka Shnong Biar bad Pyntei kiba hap hapoh ka West Jaiñtia Hills District.
Ïa kane ka jingleit sam marbam la ïalam da u Founder Chairman u Bah L. Dkhar, ha ka Shnong Biar la pynïaid ïa ka jingïalang kaba rit da u Secretary Shnong u ma P. Sungoh bad u ba long ruh kum u Finance Secretary ka Orphan Children Foundation West Jaiñtia Hills la ïoh ïa ka jingkren lyngkot na ka kong M. Bareh Office Secretary Orphan Children Foundation West Jaiñtia Hills bad la ïoh ruh ïa ka jingkren na u Founder Chairman ka OCF Jaiñtia Hills u bah L Dkhar.
Katba ha ka shnong Pyntei la pynïaid ïa ka jingïalang da u Secretary ka Shnong u Y. Syngkon bad ula ong ruh ba ka Shnong ka pdiang sngewbha bad sngew burom shi kat dei eh ïa kane ka Foundation kaba ki la lah ban wan ïarap ïa ki khynnah khunswet bad ïa kiba Duna Dkhot Met kiba don kam shisha ïa ka jingïarap.
La ïoh ruh ïa ka jingkren lyngkot na u Finance Secretary ka OCF u P. Sungoh, kumjuh na u Founder Chairman katei ka Foundation u bah L. Dkhar ha kaba ula ong ka OCF hi ka kloi ban ïarap ïa kum kine ki briew kiba don kam ïa ka jingïarap bad ula ong ruh ka thong kaba ha khmat duh jong ka Foundation ka long ban pynlong tara jur ïa ki khynnah.
Lada long ki khunswet kiba duna dkhot met wat lada kim don kmie don kpa ne wat lada ki duna ruh ym dei ban ibeiñ ne leh beiñ ïa ki bad ula ong ruh lada dang don ki khynnah ki bym pat ïoh jingïarap ha kane ka sngi ha kane ka Shnong ki lah ban phone ha ki Volunteer jong kane ka Foundation khnang ba kin lah ban leh ïa kaba don kam.
Shuh shuh ula ong ruh lada ki nongri nongsumar ki ïa kynduh jingeh khamtam ha ka por ba ki pang ki shitom ka Foundation ka kloi ban ïarap ïa kaba dei ban ïarap bad da ka jingkyrmen ba kin sa ïoh biang ka lad ban ïa kynduh bad ban ïarap ïa kine ki khunswet bad kiba duna dkhot met da ka jingïatrei lang lem bad ki nong pynïaid shnong jong kane ka Shnong.
Haba pynkut ka jingkren u bah Dkhar ula pynsngew shibun ki jingeh ba kine ki khynnah ki donkam ïa ka jingiarap hynrei ka Foundation kaba dang rit kam pat lah ban leh bha hynrei da ka jingkyrkhu jong U Blei ka lad kan sa plie hi ïa kane ka Foundation ban pyndep ïa ki jingmut ba bha ha ki sngi ban wan.