Plie u Conrad ïa ka shlem ai jinghikai phutbol ‘Dare to Dream’ ha SAI, NEHU, wan sakhi lang u Bhaichung Bhutia

Shillong, Jymmang 18 : U Conrad K Sangma Myntri Rangbah ka Jylla ha ka sngi Palei u la plie paidbah ïa ka shlem ai jinghikai ban pyntbit ha ka liang ka jingïalehkai phutbol, kaba la tip kum ka ‘Dare to Dream’ Football development program ha SAI, NEHU. Ha katei ka sngi u Baichung Bhutia, uwei na ki rangïalehkai ba kynsai uba la bna nam ha baroh kawei ka pyrthei, u la wanpoi ha ka nongbah Shillong ban ïadonlang ha kane ka sngi plie ïa ka ‘Dare to Dream’ Football development program kaba la pynlong ha SAI, NEHU.
Ïa kane ka program la snohkti lang bad ka Assam Rifles Public School, BBFS Residential Academy, Indian Football Foundation bad ka Baichung Bhutia Football School bad ha kane ka program la wan ban shimbynta haduh 50 ngut ki heprit.
U Conrad K Sangma, u la pynpaw ïa ka jingsngewnguh ïa ka Dream Foundation bad ïa ka Baichung Bhutia kiba la jied ïa ka Shillong kum ka jaka ban buh ïa ka residential football academy ha North East namar kane ka long ka kabu ïa ki heprit kiba kwah ban kiew ha ka jinglehkai, ki lah ban ïoh ïa ka jingshah pyntbit lyngba kane ka program.
“Ha ki Olympic kiban sa wan, lah ban ïoh ïa uwei na ka jylla Meghalaya ban ïoh khur ïa ki takma bad ka sorkar ka la wanrah ïa ka STAR Talent Identification Program ban ithuh kyrpang ïa ki nongïalehkai bad ïa ki Coach,” ong u Myntri Rangbah. U Bhaichung Bhutia haba ïakren bad ki lad pathai khubor hadien ba la kut ka prokram u la ong, “Ka ri India kadei ka ri kaba la khie im bha ha ka jinglehkai football, bad kaba kongsan mynta ka long ban pynkhreh na ka bynta ka Asia Cup kaban sa long ha u Kyllalyngkot 2024 bad lada lah ban jop ïa ka Asia Cup, ka India kan rung ha ka top 10 ha dewbah Asia bad mynta ka la don ka jingpynkhreh ïa ka lympung SAFF Championship kaban sa long noh shen ha Odisha bad nangne kan poi ka thong ban poi sha ka World Cup.”
U la ong ba kawei kaba wanrah jingduna ha ka football ka long ba ka don ka jingbym biang ka rukom pynïaid ha ki grassroot level, bad donkam ban pynkhlaiñ ïa ki district level bad state level ban ailad ïa ki khynnah kiba don sap ban kiew ha ki jingïalehkai ka jong ki.
“Kaba donkam ka long ba lyngba ka ISL bad I- League, ka long ka kabu ïa ki samla ban kamai namar ka tulop ba ki ïoh ka long kaba la heh, bad ka ladei ka por ba ki rangïalehkai kiba kynsai kum u Eugeneson Lyngdoh ban shimti ïa ka Meghalaya Football ban kyntiew ïa ka kam football ha ka jylla bad ban lamkhmat ïa ka jylla ha ki tournament kiba bun,” la ong u Bhaichung Bhutia.
Ha kane ka sngi, ka la don ka jingïalehkai kynjat bol paralok ha ka jingplie ïa katei ka shlem ai jinghikai, ha kaba u Myntri Rangbah u Conrad K Sangma u la ïashim bynta lang. Bad ha kane ka sngi, u Conrad u la mih noh na madan bad phah mih bujli da uwei u nongthoh khubor, bad u la shim ïa ka mobile phone bad ring video ïa ka jingïalehkai.