Nongpoh, Nohprah 02 : U Myntri Rangbah ka jylla u Conrad K Sangma mynta ka sngi u la leit ban plie paidbah ïaki kam pynroi ha Nongpoh Constituency ba kynthup ïaka Primary Health Center ha Marmaiñ kaba la dep ban buh mawnongrim naduh u snem 2006 ban kyntiew ïaka jingshakri haka liang ka koit ka khiah bad aiti ruh 2 tylli ki Ambulance bad ha katei ka juh ka sngi la ioh ruh ban plie ïaka GNM School of Nursing kaba don haka shnong Pahamsyiem ban pynsuk ïaki samla kiba pule Nurse ba kim donkam shuh ban leit sha ki jaka ba jngai.
Ha katei ka sngi la sakhi ruh da ka jingdonlang u MLA ka Nongpoh u Bah Mayral Born Syiem, Bah Balajied Ranee, Bah Balajied Ranee MDC, Kong Macdalyne S Mawlong MDC ka Umsning, Bah M Tongper ADC, ki ophisar naka tnad ka koit ka khiah, ki Rangbah Shnong bad kiwei kiwei ki riew rangbah ka thaiñ.
Haba kren ha katei ka sngi naka liang u Bah Mayralborn Syiem u la ai ka jingkhublei ïa baroh ki bala don bynta ban pynurlong ïa kane ka jingthrang jong ki paidbah bala ioh syndon ban plie pyrda ruh ïaka PHC bad kumjuh ruh ka GNM School of Nursing bad khamtam ïa ka sorkar MDA hapoh ka jingïalam u Conrad K Sangma ba ki la trei shitom ban pynurlong ïaki kam pynroi hapoh ka dong bad ka thaiñ Ri-Bhoi.
U la ong ruh baka Marmaiñ PHC ka dei ka jingangnud kaba la slem jong ki paidbah ka thaiñ Marmaiñ kaba ki paidbah ki mad jingeh baroh shikatta ha kaba ïadei bad ka jaka sumar kaba ki hap ban leit shaduh Umden PHC nalor ka surok kaba sniew, hynrei kum u MLA u la ju buddien naka por shaka por ban pynurlong ïa katei ka jingangnud jong ki paidbah bad ka long ka jingkmen kaba khraw hadien ba la lah ban plie paidbah syndon ïa katei ka PHC mynta ka sngi bad hakajuh ka por kan long ruh ka jingkyrkhu ïa kiba bun ki samla pule ka thaiñ hadien ba la lah ban plie paidbah ruh ïaka GNM School of Nursing ban long kum ka shlem hikai ïaki samla kiba kwah pule Nurse.
Ha katei ka juh ka sngi naka liang u MLA u la pynsngew ruh hakhmat u Myntri Rangbah halor shibun ki jingduna ha Nongpoh Constituency ha kaba ïadei bad ki kam pynroi khamtam ka jingdonkam ban siang rong noh ïa u surok Nongpoh-Umden-Sonapur u ba dei u surok ba donkam eh jong ki paidbah kiba la mad jingeh mynta la bun snem namar ka jingsniew bad ka jingjot rathai kaba la buh jingeh ïaki paidbah haka leit ka wan.
Naka liang u Conrad Sangma u la ai ka jingkhublei ïaki nongïalam baroh kiba la trei shitom haduh kane ka sngi ban ioh plie paidbah syndon ïa kane ka PHC, u la ong ruh ba na ka liang ka sorkar MDA hapoh ka jingïalam jong u, kin trei shitom ban pynthikna ba kane ka PHC kan lah ban ai ka jingshakri kaba bha tam na ka bynta ki paidbah, u la ong ruh ba un pynthikna ba ki jingdonkam jong kane ka PHC kan urlong lut naduh ki nongtrei haduh ki tiar ki tar khnang ba kan nym don ka jingthud haka jingshakri jong ka PHC na ka bynta ki paidbah.
Hakajuh ka por naka liang u Myntri Rangbah ha katei ka sngi u la pynpaw ruh ka jingsngewkmen kaba khraw hadien bala lah ban plie paidbah noh ïaka GNM School of Nursing ka ban long kum ka shlem ai jinghikai ïaki khun samla bad kyrmen ba lyngba katei ka jaka ai jinghikai kan pynmih ïaki samla kiba ban shakri haka tnad ka koit ka khiah bad kyntu ruh ïaki khun samla ban shim kabu bad khamtam ban hikai ruh ban nang kiwei ki jait ktien khnang ba ki khun samla hadien ba kila dep ban pule kin ioh pat ban trei shabar jylla.
